طالبانو روانه اوونۍ په خوست، فراه، بغلان او کابل ولایتونو کې د بېلا بېلو تورونو پر اساس، د یوې ښځې په ګډون ۲۲ تنه په عام محضر کې په دورو وهلي دي.
رخشانه: دغه کسان د «اخلاقي فساد، لواطت، جګړې، نامشروع اړیکې او نشه کوونکو ګولیو، الګولي مشروباتو او چرسو د پېر، پلور او قاچاق» په تور په دغه ولایتونو کې په دورو وهلي دي.
د دوشنبې په ورځ د (وږي ۲۴ ه) د یوې ښخې په ګډون ۱۱ تنه د «اخلاقي فساد، لواطت، جګړې او نامشروع اړیکې» په تور په خوست او فراه ولایتونو کې د خلکو پر وړاندې په دورو وهل شوي دي.
شپږ تنه د «اخلاقي فساد او لواطت» په تور د خوست ولایت په سپرې ولسوالۍ کې د خلکو پر وړاندې ۳۹ دورې وهل شوي او پنځه کاله تنفذي بند سزا باندې هم محکوم شوي دي.
د یوې ښخې په ګډون پنځه تنه نور بیا د «جګړې او نامشروع اړیکې» په تور د فراه ولایت په بالابلوک او شېب کوه ولسوالیو کې د خلکو پر وړاندې له ۲۰ تر ۳۹ دورې وهل شوي دي.
معلومه نه ده، چې دې کسانو ته څومره موده بند اورول شوی دی.
د سه شنبې ورځ د (وږي ۲۵ مه) ۱۱ تنه د «اخلاقي فساد او نشه کوونکو ګولیو، الګولي مشروباتو او چرسو د پېر، پلور او قاچاق» په تور په بغلان او کابل ولایتونو کې د خلکو پر وړاندې په دورو وهل شوي دي.
یو تن د «اخلاقي فساد» په تور د بغلان ولایت خوست ولسوالۍ کې د خلکو پر وړاندې ۳۵ دورې وهل شوی او یو کال، یوه میاشت او ۲۱ ورځې تنفذي بند باندې محکوم شوی دی.
۱۰ تنه نور بیا «د نشه کوونکو ګولیو، الګولي مشروباتو او چرسو د پېر، پلور او قاچاق» په تور په کابل ولایت کې له ۱۰ تر ۳۹ دورې وهل شوي دي.
دغه کسانو ته کابل کې د طالبانو د نشه يي توکو او مسکراتو ضد ابتدایه محکومې له خوا له لسو میاشتو تر یوه کاله او شپږ میاشتو پورې د تنفذي بند سزا هم اورول شوې ده.
طالبانو د تېرې اوونۍ په جریان کې هم د شپږو ښخو په ګډون ۳۰ تنه د بېلا بېلو تورونو پر بنسټ په تخار، کابل، بلخ او بغلان ولایتونو کې په عام محضر کې په دورو وهلي وو.
