افغانستان کې د ملګرو ملتونو د ښځو څانګه (UN Women) وايي، افغانستان کې له زلزلې وروسته ښځې او نجونې له لا زیاتو ګواښونو په ځانګړې توګه له جنسیتي تاوتریخوالي او کم عمره ودونو سره مخ دي.
رخشانه: دغه بنسټ تېره ورځ ناوخته( جمعه د وږي ۲۸ مه) پر خپله اېکس پاڼه د یوې ویډیو په خپرولو سره لیکلي، د افغانستان ختیځ کې له زلزلې تر ټولو زیات زیان ښځو ته رسېدلی دی.
افغانستان کې د ملګرو ملتونو سازمان د ښځو څانګې استازې سوزان فرګوسن په دې ټينګار سره، چې د افغانستان ختیځ کې د شوې زلزلې تر نیمايي زیات قربانیان ښځې او نجونې دي ویلي، د افغانستان ختیځ کې د زلزلې رامنځ ته کېدو وروسته«ښځو او نجونو ته ګواښونه مخ پر زیاتېدو دي.»
هغې ویلي:«له زلزلې وروسته ښځې او نجونې له زیاتو ګواښونو په ځانګړې توګه له جنسیتي تاوتریخوالي او ماشومانه ودونو سره مخ دي.»
فرګوسن په دې ویډیو کې وايي، د اوبو او مردارو اوبو سیستم په خرابېدو او په غیر رسمي مېشت ځایونو کې د حفظ الصحې نشتوالي ډېری ښخې او نجونې دې ته اړ کړې، چې د اوبو او لومړنیو اړتیاوو پوره کولو لپاره اوږد واټن ووهي.
افغانستان کې د ملګرو ملتونو د ښځو څانګې په زلزله ځپلو سیمو کې دغه رامنځ ته شویو ستونزو ته په اشارې وايي، یو برخه د کورنیو سرپرست مېرمنې یا هغه چې د نوزېږدو، عمرخوړلو یا څاروی پالنه کوي، نه پوهېږي، چې له کومه ځایه مرستې واخلي یا د مرستو تر لاسه کولو لپاره له ځای پر ځای کېدو وېره لري.
هغې د زلزله ځپلو ښخو او نجونو وضعیت خراب وباله او له هغوی یې د بېړني او دوامداره ملاتړ غوښتنه وکړه.
په ورته وخت تېره اوونۍ د افغانستان لپاره د ملګرو ملتونو د سرمنشي ځانګړې استازې او د یوناما مشرې ویلي وو، د ملګرو ملتونو سازمان پر ښځینه کارکوونکو محدویت زلزله ځپلو کسانو ته د مرستو رسولو بهیر له خنډ سره مخ کړی دی.
د روانې میلادي میاشتې په لومړیو کې د هېواد ختیځ کې مرګونې زلزلې کې تر دوه زره زیاتو کسانو چې ډېری یې ښځې او ماشومان ژوند له لاسه ورکړ او کابو دوه زره تنه نور ټپيان شول.
