د افغانستان د عدالت غوښتوونکو ښځو اعتراضي غورځنګ انټرنېټي خدماتو، نوري فایبر او وای پای ته د خلکو د لاس رسي پرې کولو په تړاو وايي، طالبان د انټرېټ په پرې کولو سره هڅه کوي، د ښځو غږ خاموش او خپل جنایتونه پټ کړي.
رخشانه: د دې اعتراضي غورځنګ غړو نن (یکشنبې د وږي ۳۰ مه) په یوه بیانیه کې لیکلي، چې طالبانو د انټرنېټ په بندلو له نړۍ سره د افغانستان د خلکو وروستۍ ارتباطي لار هم پرې کړه.
د افغانستان د عدالت غوښتوونکو ښځو د اعتراضي غورځنګ په بیانیه کې راغلي، طالبانو په دې کار سره تصمیم لري، چې د هېواد ځوان نسل راتلونکې په تیارو کې خښه کړي.
په بیانیه کې زیاته شوې:«طالبانو زموږ کتابونه، لپټاپونه او تلېفونونه په ځنځیر وتړل او هڅه یې وکړه، چې د افغانستان د ځوان نسل راتلونکې په تیارو کې ډوبه کړيږ»
معترضو مېرمنو ویلي، د دې طالبانو په دې اقدام سره زرګونه افغان نجونو له انلاین زده کړو پاتې شوې.
دوی ټينګار کړی، طالبان به هېڅ کله هم بریالي نه شي، چې د افغان ښخو غږ غلی کړي.
د طالبانو مشر تېره اوونۍ د یوه فرمان په ترڅ کې د هېواد په ګوټ ګوټ کې انټرنېټ ته د خلکو په لاس رسي د بندېدو امر ورکړ.
د دې امر په ترڅ کې تر اوسه پورې د هېواد په لږ تر لږه یوولسو ولایتونو کې نوري فایبر او وای فای انټرنېت ته د خلکو لاس رسی پرې شوې دی.
