د افغانستان له رسنیو د ملاتړ بنسټ، (AMSO) په خپل تازه راپور کې د طالبانو تر واک لاندې هېواد کې د رسنیو د وضعیت په اړه وايي، ۹۲ سلنه ښځینه خبریالانې د خپلو راپورو تغیر یا سانسور ته اړ شوې دي.
رخشانه: د دې بنسټ په راپور کې چې«د نظام له بدلون وروسته د افغان ښځینه خبریالانو مقاومت» تر نوم لاندې خپور شوی راغلي، په هېواد کې کابو اووه سلنه ښځینه خبریالانې په آزاده توګه د رسنیز فعالیت اجازه لري.
د افغانستان له رسنیو د ملاتړ بنسټ راپور وايي، ۳۵ سلنه ښځینه خبریالانو ویلي، چې د رسنیو له محدویتونو سره سره، خپلو فعالیتونو ته دوام ورکوي.
د دې راپور د موندنو پر اساس، په هېواد کې ۲۴ سلنه ښځینه خبریالانې اړ شوې، چې خپلې رسنیزې دندې پرېږدي.
په راپور کې راغلي، د طالبانو د محدویتونو له امله، ۳۲ سلنه ښځینه خبریالانې اړ شوې، چې په پټه فعالیت وکړي.
ښځینه خبریالانو په هېواد کې«سانسور، له نارینه وو سره د مرکې نه کول، د محرم اړتیا، اجباري جامې اغوستل، څار او توکو ته په لاس رسي محدویت» رسنیز محدویتونه بللي دي.
د افغان رسنیو د ملاتړ بنسټ وايي، ۵۵ سلنه خبریالانې د خپل کار له امله، د ځینو کسانو له خوا ګواښل شوې دي.
یاد سازمان دغه راز ویلي، ۸۰ سلنه ښځینه خبریالانو په تېر یوه کال کې، د رسنیو له بنسټونو هېڅ ډول مرسته او ملاتړ نه دی تر لاسه کړی.
په راپور کې راغلي، کابو نیمايي خبریالان راتلونکی کال، په رسنیو د کار دوام ته هیله نه لري.
طالبانو د ښځې غږ ستر بللی او په همدې دلیل یې څو ځلې په خبري ناستو کې، د ښځینه خبریالانو غږ او انځور پرې کړی دی.
دغه ډله پر رسنیو او رسنیزو فعالیتونو د سختو محدویتونو لګولو سره، د لسګونه رسنیو د تړل کېدو او ګڼ شمېر خبریالانو او رسنیزو کارکوونکو د بېکاره کېدو لامل شوې ده.
دغه راز د طالبانو ډلې په هېواد کې د خپلې څلورکلنه واکمنۍ پر مهال ګڼ شمېر خبریالان، کارکوونکي او رسنیز فعالان نیولي او زنداني کړي دي.
