کندهار کې سیمه ییزه سرچینې وايي، په دې ولایت کې د طالبانو د امربالمعروف ریاست د نارینه خیاطانو له خوا د ښځو د جامو کنډل بند کړل.
رخشانه: کندهار کې یوې سرچینې د هویت پټ ساتلو سره رخشانې رسنۍ ته ویلي، دغه محدویت له تېرې اوونۍ راپدېخوا لګول شوی دی.
د سرچینې په وینا، کندهار کې د طالبانو د امربالمعروف ریاست ټولو نارینه خیاطانو ته ویلي، نور حق نه لري، چې د ښځو کالي وګنډي.
د رخشانې رسنۍ سرچینې زیاته کړه، د طالبانو د امربالمعروف ځواکونو تېره اوونۍ لس تنه خیاطان د ښځو د جامو ګنډلو له امله نیولي او وروسته یې په ضمانت خوشي کړي دي.
دغه ګام کندهار ښار کې د لسګونه نارینه خیاطانو د بېکارۍ لامل شوی دی.
په ورته وخت کندهار کې یوې باخبره سرچینې ویلي، د طالبانو د امربالمعروف ریاست دا هم ویلي، راتلونکې کې به په دغه ولایت کې پر ښځو له دې زیات محدویتونه ولګول شي.
تر اوسه کندهار کې د طالبانو د امربالمعروف ریاست په دې اړه کومه رسمي بیانیه نه ده ورکړې.
له دې وړاندې هم سرچینو رخشانې رسنۍ ته ویلي وو، چې د طالبانو د امربالمعروف ځواکونو په دې ښار کې د ښځو د جامو ګنډل بند کړي وو.
د رخشانې رسنۍ سرچینو زیاته کړې وه، چې طالبانو د دې امر څخه د سرغړونې په خاطر دوه تنه وهلي ډبولي وو.
