په افغانستان کې د ملګرو ملتونو د خوړو نړیوال سازمان (WFP) وايي، افغانستان کې ۴.۷ میلیونه ښځې او ماشومان په خوارځواکۍ اخته دي.
رخشانه: دغه بنسټ نن (دوشنبې د وږي ۳۱ مه) پر خپله اېکس پاڼه د یوه پوسټ په خپرولو سره لیکلي، افغانستان کې ۹.۵ میلیونه کسان د خوړو له سخت کمښت سره مخ دي.
د خوړو نړیوال سازمان د هېواد په ختیځ کې درې اوونۍ وړاندې زلزلې ته په اشارې ویلي، دغې طبیعي پېښې زرګونه کسان وژلي او زرګونه نور یې ټپيان او یا اغېرمن کړي دي.
د خوړو نړیوال سازمان په وینا، دغې طبیعي پېښې د هغه ناورینونو پر ټولګه، چې افغانستان یې له وړاندې تر اغېز لاندې وو زیاتوالی کړی او بشردوستانه اندېښمنوونکی لید لوری یې لا ژور کړی دی.
دغه راز یاد بنسټ وايي، افغانستان دا مهال د خورا ځواکۍ زیاتېدونکي بحران، له ایران او پاکستان څخه د کډوالو په زرو ستنېدو، سختې وچکالۍ او د بودجې د محدویتونو له امله د بشري مرستو د کمېدو سره لاس او ګرېوان دي.
د خوړو نړیوال سازمان په اعلامیه کې راغلي، د ښځو تر سرپرستۍ لاندې دوه پر درېیمې کورنۍ د لومړنیو خوراکي توکو د پېرودلو توان نه لري او ښځې او نجونې تر ټولو زیات بشري مرستو ته اړتیا لري.
دغه بنسټ اعلان کړی، د بودجې د کمښت له امله اړ دی، چې د خوارځواکۍ په مرکزونو کې په خوارځواکۍ د اخته میندو او ماشومانو منل ودروي.
د خوړو نړیوال سازمان ټينګار کړی، چې دغه بنسټ اړمنو ته د رسېدنې په پار د ۲۰۲۶ کال تر فبرورۍ میاشتې پورې ۵۶۸ میلیون ډالرو ته بېړنۍ اړتیا لري.
