د بشري حقونو یو شمېر فعالانو د «هزاره ګانو د نسل وژنې او د کابل لوېدیځ کې پر کاج ښوونیز مرکز د برید د کلیزې یاد» په پار جوړې شوې غونډه کې، په افغانستان کې د هزاره ګانو د نسل وژنې په رسمیت پېژندلو غوښتنه وکړه.
رخشانه: دا پروګرام تازه د نیو انګلنډ هزاره ګانو له خوا د امریکا ماساچوست ایالت په بوستون ښار کې جوړ او په کې د بشري حقونو یو شمېر فعالانو لکه، د افغانستان د بشري حقونو د خپلواک کمېسیون پخوانۍ مشرې ډاکتر سیما سمر ګډون کړی وو.
د جمهوریت په دوره کې د بشري حقونو د خپلواک کمېسیون مشرې ډاکتر سیما سمر په دې ناسته کې و ویل، افغانستان کې د هزاره ګانو نسل وژنه، باید د دې لامل نه شي، چې هزاره وګړي له نورو قومونو د غچ اخیستنې په لټه کې شي.
هغې زیاته کړه: «که زموږ خلک [هزاره وګړي] په غچ اخیستنه کې وي، نو د قتل او وژنو ارټ به دوام پیدا کړي، چې د دې څرخ دوام د انساني کرامت او اخلاقو پر ضد دی.»
د بشري حقونو فعالې او یوې بلې ویناوالې ډاکتر مستوره شفايي هم په افغانستان کې د هزاره ګانو د نسل وژنې په اړه د جوړې شوې غونډې په ارزښت او اوسنیو ستونزو خبرې وکړې.
هغې له نړیوالې ټولنې، ملګرو ملتونو، جرمونو ضد نړیوالې محکمې، ګاونډیو هېوادونو او بشري حقونو له بنسټونو وغوښتل، چې په افغانستان کې د هزاره ګانو نسل وژنه په رسمیت وپېژني.
د بشري حقونو دغې فعالې همدارنګه وغوښتل، چې نړیواله ټولنه، ملګري ملتونه او د بشري حقونو بنسټونه دې، طالبان د بشري حقونو د پراخ سرغړاوي، په ځانګړې توګه د هزاره ګانو او ښځو پر وړاندې ځواب ویوونکي کړي.
شفايي دغه راز په افغانستان کې په زور د کډوالۍ د مخنیوي غوښتنه وکړه او ویې ویل، کوچیان او د دې جنایتونو عامیلین، باید تر نړیوالې پلټنې او څار لاندې ونیول شي.
نوموړې په افغانستان کې د بشريت پر وړاندې د جنایت په توګه، د جنستي توپیر په رسمیت پېژندلو او له هغې سره د مقابلې غوښتنه وکړه او له ګاونډیو هېوادونو د ښځینه فعالانو د ایستلو لړۍ د درېدو او د هغوی د پناه غوښتنې دوسیو ته د لومړیتوب ورکولو باندې یې ټینګار وکړ.
په دې ناسته کې ګډونوالو د طالبانو تر واک لاندې افغانستان کې، د هزاره ګانو د وضعیت، سازمان شویو وژنو، په زور کډوالۍ، د ځمکو نیولو او د هزاره ګانو د نسل وژنې لپاره د عدالت غوښتنې پر وضعیت خبرې وکړې.
هغوی دغه راز په افغانستان کې د هزاره ګانو د قتل او ډلیزه وژنو دوام ته په اشارې، د هزاره ګانو د نسل وژنې په رسمیت پېژندلو غوښتنه وکړه او د جرمونو د مستند کولو لپاره یې، د یوې ګټورې کړنلارې او مستند جوړونې پر اړتیا ټینګار وکړ.
په دې ناسته کې د هغه هزاره قربانیانو، چې په وروستیو څو کلونو کې، په افغانستان او پاکستان کې قرباني شوي، انځورونه هم عمومي نندارې ته وړاندې کړای شول.
ګډونوالو د شمع په بلولو سره د حق غوښتې د دوام او عدالت او انساني حقونو لپاره پر مبارزې ټینګار وکړ.
