د هېواد په یو شمېر ولایتونو کې د نوري فایبر او وای فای انټرنېټ پرېکېدو ته د غبرګونونو په دوام، د افغان ښځو د سیاسي ګډون شبکې ویلي، د طالبانو دغه اقدام د یوه ملت د راتلونکې له منځه وړولو په مانا دی.
رخشانه :د دې اعتراضي غورځنګ غړو تازه په یوه اعلامیه کې لیکلي، د طالبانو محدویتونو له ښځو او نجونو د کار او زده کړو فرصت اخیستی او هغوی یې له خپلو تر ټولو ابتدايي آزادیو څخه محرومې کړې دي.
د ښځو د سیاسي ګډون شبکې په اعلامیه کې راغلي: «د طالبانو تر واکمنېدو وروسته افغانستان په ژورو تیاره کې ډوب شوی، هغه تیاره چې د بشري حقونو، فردي آزادیو او انساني کرامت د سیستماتیکو سرغړونو نېغه پایله ده.»
معترضو ښځو په ښوونځیو او پوهنتونونو کې د ښځو او نجونو پر زده کړو محدودیتونه « د جنستي توپیر او له هېواد سره د دښمنۍ ښکاره نښه» ګڼلې ده.
هغوی ویلي، طالبانو د معترضو ښځو، خبریالانو، بشري حقونو د فعالانو او مخالفو غږونو په پراخې ځپنې او تاوتریخوالي سره، د یوه ظالم او زورواکي حکومت ریښتینې څېره بربنډه کړې ده.
د افغان ښځو د سیاسي ګډون شبکې غړو له هغو کتابونو چې ښځو لیکلي، د ګټې اخیستنې مخنیوی، د فکر او پوهاوي سره د دښمنۍ نښه بللې ده.
هغوی ټینګار کړی، چې د طالبانو هره ورځ محدویتونو پر ښاریانو کړۍ راتنګه کړې، د ځوانانو د ودې مخنیوی کوي او له «ناهیلۍ، بېوزلۍ او غليتوب پرته بله پایله له ځان سره نه لري.»
د ښځو د سیاسي ګډون شبکې غړو، انټرنېټ «تحصیل او پرمختګ ته د ښځو او نجونو د رسېدو یوازینۍ لار» بللې وايي، انټرنېټ نباید پرې شي.
دوی دغه راز له نړیوالې ټولنې غوښتي، چې نور چوپتیا غوره نه کړي او له افغان ښخو په ملاتړ سره د هغوی غږ جوړ شي.
« له ایران او پاکستانه د افغان کډوالو د اجباري ایستلو لړۍ درول او په افغانستان کې د جنستي توپير په رسمیت پېژندنه» د معترضو ښځو نورې غوښتې دي.
د طالبانو مشر تېره اوونۍ د هېواد په ګوټ ګوټ کې، د نوري فایبر او وای فای انټرنېت د پرېکولو امر ورکړ. د دې امر په ترڅ کې تر اوسه، د هېواد په لږ تر لږه ۱۲ ولایتونو کې د نوري فایبر او وای فای انټرنېټ خدمتونو ته د خلکو لاسرسی، پرې شوی دي.
