هرات کې سیمه ییزه سرچینې وايي، د طالبانو ځايي ادارې انټرنېټ وړاندې کوونکو شرکتونو ته امر کړی، چې د شپې له خوا د خدماتو وړاندې کول بند کړي.
رخشانه: لږ تر لږه درې سرچینو رخشانې رسنۍ ته تایید کړې، چې له تېرې شپې (سه شنبې د تلې اولې) څخه یې وای فای انټرنېټ ته لاس رسی بند شوی دی.
د سرچینو په وینا،د انټرنېټ وړاندې کوونکو شرکتونو له خوا وای فای انټرنېټ ته د کاروونکو لاس رسی، د شپې له ۱۰:۰۰ د سهار تر ۸:۰۰ بجو پورې پرې شوی دی.
هرات کې د طالبانو ځايي ادارې تر اوسه د شپې لپاره د انټرنېټي خدماتو بندېدو په اړه څه نه دي ویلي.
په هرات ښار کې وای فای انټرنېټ ته د کاروونکو د لاسرسي پرېکېدو ښاریان په ځانګړې توګه زده کوونکې نجونې، چې د انټرنېټ پر مټ انلاین زده کړې کوي، اندېښمنې کړې دي.
هرات کې یوې زده کوونکې نجلۍ د هویت پټ ساتلو سره رخشانې رسنۍ ته ویلي، چې د دې محدویت له امله یې انلاین ټولګی مختل شوی دی.
هغې زیاته کړې: «زه هره ورځ د سهار له اتو د مازیګر تر شپږو بجو پورې د خیاطۍ په کارخونه کې وم او د شپې له لوري په انلاین ټولګي کې ګډون کوم او د زده کړو ویډیوګانې ګورم، خو که وای فای پرې شي، له زده کړو پاتې کېږم.»
هرات کې یوې بلې زده کوونکې نجلۍ هم ویلي، که وای فای انټرنېټ ته د کاروونکو د لاسرسي بندښت اوږد شي، دا به د انګلیسي ژبې په انلاین ټولګي کې له زده کړو څخه پاتې شي.
هغې پر طالبانو د نیوکې په ترڅ کې و ویل: «یعنې موږ به په ۲۱ مه پېړۍ کې، چې نړۍ پرمختګ کړی، د شپې له خوا د انټرنېټ له کارولو محروم وو؟ اصلآ ولې باید نېټ پرې شي؟ دا څه ژوند دی، چې دغو [طالبانو] پر موږ راوړی دی؟»
د طالبانو مشر تېره اوونۍ د انټرنېټ خدماتو وړاندې کوونکو شرکتونو په فعالیتونو او له نوري فایبر او وای فای انټرنېټ څخه د کاروونکو د کارونې د مخنیوي امر ورکړ.
د دې امر په ترڅ کې تر اوسه د هېواد په لږ تر لږه ۱۲ ولایتونو کې، د نوري فایبر او وای فای انټرنېټ خدمتونو ته د خلکو لاس رسرسی پرې شوی دی.
