د فوټبال نړیوال فدراسیون (فیفا) اعلان کړی، چې د افغان کډوالو ښځینه فوټبال لوبډله، له څلورو کلونو وروسته په لومړي ځل په دوه دوستانه لوبلړۍ کې، د متحده عربي اماراتو لوبډلې سره میدان ته وځي.
رخشانه: فیفا تېره ورځ ناوخته (چهارشنبې د تلې ۲ مه) د یوې اعلامیې په خپرولو سره ویلي، ټاکل شوې دغه لوبلړۍ د اکتوبر له ۲۳ مې تر ۲۹ مې پورې تر سره شي.
د فیفا په اعلامیه کې راغلي، په دې لوبلړۍ کې به د افغان کډوالو، چاد، لبیا او متحده عربي اماراتو لوبډألې یو له بله لوبې تر سره کړي.
د فیفا په وینا، د ښځو د فوټبال دغه تاریخي پېښه به، چې څلور لوبډلې په کې ګډون لري، د فیفا هغه هڅې پیاوړې کړي، چې غواړي د ټولو ښځو او نجونو د سپورت د لوبو کولو حق ته وده ورکړي او ملاتړ یې وکړي، د دوی د فوټبال خوبونه رښتیا او د لوبو له لارې پرمختګ وکړي.
د دې سپورتي بنسټ په اعلامیه کې راوړل شوي، دا به لومړی ځل وي، چې د افغانستان د فوټبال ښځینه لوبډله په یوه نړیواله لوبلړۍ کې ګډون کوي.
د فیفا مشر جیاني اینفانټینو ویلي چې «دا دوستانه لوبلړۍ تر یوې سیالۍ ورپورته څه دي، هغوی [ښځینه فوټبالرانې] د نړۍ په ګوټ ګوټ کې د ښځو د هیلو او پرمختګ لپاره یوه بېلګه ده.»
هغه زیاته کړې: «فوټبال ته د ټولو ښځو د لاسرسي ډاډ، د فیفا لومړیتوب او د سپورت راتلونکې ته د جوړښت ورکول زموږ کلیدي موخه ده.»
د فوټبال نړیوال فدراسیون ویلي، هغه لوبډله چې ډېر امتیاز تر لاسه کړي، د دې لوبلړۍ ګټوونکې به اعلان شي.
فیفا څه موده مخکې اعلان کړی وو، چې د افغانستان د ښځینه فوټبال لوبډلې سره یې، چې د افغان کډوالو (AWRT) څخه جوړه ده، موافقت یې کړی دی.
طالبانو د ۲۰۲۱ په اګست کې واک ته په بیا رسېدو سره د سختو محدودیتونو په لګولو سره د ښځو سپورت ممنوع اعلان کړ او د هېواد د سپورټ ټولې ملي لوبډلې په رسمیت نه پېژني.
د طالبانو تر واک لاندې د افغانستان د فوټبال فدراسیون (AFF) تر اوسه په دې اړه څه نه دي ویلي.
د افغانستان د ښځینه فوټبال ملي لوبډلې واک ته د طالبانو په بیا رسېدو سره هېواد پرېښود او اوس په اسټرالیا، برېتانیا، آلبانیا، پرتقال او امریکا کې کډوالې دي.
هغوی په ورا وار ویلي، چې لا هم لېواله او چمتو دي، چې د افغانستان په استازيتوب په نړیوالو فوټبال لوبو کې ګډون وکړي
