د ماشومانو د ساتنې سازمان (save the children) اعلان کړی، چې راتلونکو څو میاشتو کې به د افغانستان ختیځ زلزله ځپلې سیمه کې نوزېږدي په خیمې کې نړۍ ته راشي.
رخشانه: دغه بنسټ تېره ورځ ناوخته (چهارشنبې د تلې ۲ مه) په یوه راپور کې ویلي، ګمان کېږي، چې د افغانستان په ختیځه زلزله ځپلې سیمه کې کابو ۱۱ زره مېرمنې امیدواره دي او په راتلونکو څو میاشتو کې به په خېمو کې زېږون وکړي.
د ماشومانو د ساتنې سازمان زیاته کړې: «هغه امیدواره مېرمنې چې له زلزلې روغې وتلې، نوزېږدي به په خېمو کې نړۍ ته راوړي، ځکه د ډبرو ښوییدو او لارو تړل کېدو له امله، روغتون ته د هغوی لېږد ګواښوونکی دی.»
دغه بنسټ «د زېږون کوتې په خېمو بدلېدو» په اړه خبرداری ورکړی وايي، د ژمي په درشل کې نوزېږدي په داسې ځای کې زېږېږي، چې د هوا درجه به له صفر ټیټې کچې ته ورسېږي او د هغوی د روغتیا لپاره به جدي ګواښونه رامنځ ته کړي.
د ماشومانو د ساتنې سازمان د راپور پر بنسټ د افغانستان په ختیځ کې د پرلپسې زلزلو له امله تر ټولو ډېرو اغېزمن شویو ولسوالیو شاوخوا ۹۰ سلنه کورنیو خېمو ته پناه وړې او کابو ۳۹ زره ماشومان په دغه سیمو کې په خلاصه فضا کې ژوند کوي.
دغه بنسټ ویلي، په زلزله ځپلو سیمو کې یې، روغتیايي، د اوبو او فاضلاب، حفظ الصحیحې کڅوړې، د نوزېږدو د اړتیا وړ توکي، نغدې مرستې او له ماشومانو د ملاتړ مرکزونه برابر کړي دي.
افغانستان کې د ماشومانو د ساتنې سازمان د پروګرامونو او حق غوښتنې مسووله سمیرا سید رحمان وايي، هېڅ نوزېږدی نه باید لومړی ساه په خېمه کې وباسي او سړه هوا به د ماشومانو د روغتیا ګواښ زیاتوي.
هغې زیاته کړې: «د ګرمو او ژمي ضد سرپناوو پرته ماشومان د هایپو ترمیا له ګواښ سره مخ کېدونکي دي. د روغتیا او تغذیې خدماتو ته د محدود لاسرسي او د اغېزمنو سیمو د جلا کېدو سره یو ځای، ژمی به د ماشومانو لپاره خورا ګواښمن وي.»
په افغانستان کې د ماشومانو د ساتنې سازمان د پروګرامونو او حق غوښتنې مسوولې ټينګار کړی، چې بېړنۍ بودجې ته اړتیا ده، تر څو سخت ژمی د افغانستان په ختیځ کې د مرګ ژوبلې کچه لا پسې زیاته نه کړي.
ملګرو ملتونو اټکل کړی، چې د افغانستان ختیځ کې له زلزلې وروسته، کابو نیم میلیون کسان مرستو ته اړتیا لري، ځکه چې اته زره کورونه وران شوي یا یې زیان لیدلی دی.
