طالبانو روانه اوونۍ په کابل، کاپیسا او میدان وردګ ولایتونو کې، د اتو ښځو په ګډون ۳۲ تنه د بېلا بېلو تورونو له امله، د خلکو پر وړاندې په دورو وهلي دي.
رخشانه: دغه کسان د « د نشه کوونکو توکو د پېر او پلور، الکولي مشروباتو، چرسو، له کوره تېښتې، غیراخلاقي او نامشروع اړیکو» په تور، په دې درې ولایتونو کې وهل شوي دي.
چهارشنبې د (تلې ۲ مه) ۱۷ تنه کابل کې د « د نشه کوونکو توکو د پېر او پلور، الکولي مشروباتو او چرسو» په تور له ۱۵ تر ۳۵ دورې و وهل شول.
دغه کسانو ته کابل کې د طالبانو د نشه يي توکو او مسکراتو ضد محکمې د پرېکړې پر اساس، له اوو تر درې کلونو د تنفذي بند سزا هم اورول شوې ده.
پنشنبې د (تلې ۳ مه) د اتو ښځو په ګډون ۱۵ تنه له «کوره د تېښتې، غیر اخلاقي اړیکې او نامشروع اړیکې» په تور په کاپیسا او میدان وردګو ولایتونو کې، د خلکو پر وړاندې په دورو وهل شوي دي.
د اتو ښځو په ګډون ۱۳ تنه له «کوره د تېښتې او غیراخلاقي اړیکې» په تور په کاپیسا ولایت کې د خلکو پر وړاندې له ۲۰ تر ۳۰ دورې ووهل شول.
معلومه نه ده، چې دغه کسانو ته څومره بند سزا اورول شوې ده.
د یوې ښځې په ګډون دوه تنه میدان وردګ ولایت کې د «نامشروع اړیکې» په تور د خلکو پر وړاندې ۲۰ دورې وهل شوي، خو معلومه نه ده، چې دې کسانو ته څومره بند سزا ورکړل شوې.
طالبانو تېره اوونۍ هم د یوې ښځې په ګډون ۲۲ تنه د بېلا بېلو تورونو له امله، په خوست، فراه، بغلان او کابل ولایتونو کې د خلکو پر وړاندې په دورو وهلي وو.
