په افغانستان کې د ملګرو ملتونو سیاسي استازولۍ (یوناما) وايي، له ښځینه کارکوونکو پرته نه شي کولای، اړمنو کسانو ته خدمات وړاندې کړي.
رخشانه: یوناما نن (پنشنبې د تلې ۲ مه) پر خپله فسبوک پاڼه د یوه پوسټ په خپرولو سره لیکلي، دغه بنسټ اړ شوی، چې د مرستو او نغدو پیسو ورکولو مرکزونه په لنډمهالې توګه وتړي.
دغه بنسټ ویلي، د کډوالو په چارو کې د ملګرو ملتونو عالي کمېشنرۍ (UNHCR) له سلګونه زره هغه کسانو سره مرسته کړې، چې له ګاونډیو هېوادونو راستانه شوي دي.
یوناما وايي، له ګاونډیو هېوادونو راستانو شویو کسانو کې ۵۱ سلنه مېرمنې دي او ۳۲ سلنه کورنۍ د ښځو له خوا سرپرستي کېږي.
طالبانو څه موده مخکې د ملګرو ملتونو ښځینه کارکوونکو ته ویلي و، چې زلزله ځپلو سیمو ته د تګ او زیانمنو کسانو ته د مرستو رسولو اجازه نه لري.
په افغانستان کې د یوناما مشرې رزا اوتونبایوا د دې محدودیتونو له لګېدو وروسته اعلان وکړ، چې د ملګرو ملتونو پر ښځینه کارکوونکو بندیزونو، د مرستو رسولو بهیر له ستونزو سره مخ کړی دی.
هغې ویلي وو، د کډوالو په چارو کې د ملګرو ملتونو عالي کمېشنري د ښځینه کارکوونکو له شتون پرته، نه شي کولی راستنېدونکي ثبت کړي.
د افغانستان لپاره د ملګرو ملتونو د سرمنشي استازې ټینګار کړی وو، چې زلزله ځپلو په ځانګړې توګه ښځو او ماشومانو ته د مرستو رسولو په برخه کې د ښځو له شتون څخه انکار د منلو نه دی.
