د افغانستان د خبریالانو مرکز (AFJC) د طالبانو له لوري د نیول شوي خبریال مهدي انصاري د اجباري اعتراف ویډیو خپرول په کلکه وغندل.
رخشانه: دغه مرکز پرون ماښام (پنشنبې د تلې ۱۰ مه) د یوې اعلامیې په خپرولو سره لیکلي، د افغان خبري آژانس د خبریال مهدي انصاري د اجباري اعتراف ویډیو خپرول د دغه خبریال د «عادلانه محکمې د اصولو او بشري حقونو ښکاره سرغړونه» ده.
د افغانستان د خبریالانو مرکز د طالبانو دغه اقدام د «رسنیو او رسنیزو فعالانو د پراخې ځپنې او محدودیتونو د لړۍ برخه» بللې چې د هېواد د وګړو د حقونو او رسنیو د مسلکيتوب لپاره جدي ګواښ رامنځ ته کوي.
تېره ورځ د طالبانو استخباراتو پورې تړلې شبکې «صدای هندوکش» په خواله رسنۍ، د مهدي انصاري د اجباري اعتراف ویډیو خپره کړه او د دې ویډیو په وضاحت کې یې لیکلي، چې هغه د طالبانو پر ضد د «زهرجنو تبلیغاتو» او د بهرنیو رسنیو سره د همکارۍ په تور نیول شوی دی.
د دې ویډیو د ثبت پر مهال د ثبت کره نېټه او د مهدي انصاري د روحي- رواني حالت څرنګوالی نه دی معلوم.
د افغان خبري آژانس خبریال مهدي انصاري د تېرکال د تلې میاشتې په ۱۴ مه نېټه د دفتر له کار څخه د راستنېدو پر مهال د کابل لوېدیځ پل خشک سیمې څخه ورک شو او کورنۍ یې درې ورځۍ وروسته تایید کړه، چې هغه د طالبانو استخباراتو نیولی دی.
طالبانو دغه خبریال د «نظام ضد تبلیغ» په تور په یوه کال بند محکوم کړ او اوس مهال په زندان کې شپې او ورځې تېروي.
د افغانستان د خبریالانو مرکز د دې خبریال محکمه کېدل غیرعادلانه وبلل وايي، طالبانو د خپلواک مدافع وکیل په نه شتون کې، هغه په بند محکوم کړی دی.
یاد مرکز ویلي، دوی له طالبانو غوښتي، چې په هېواد کې د خبریالانو او رسنیزو فعالانو نیونې، د بیان د آزادۍ او رسنیو د ځپلو لړۍ ودوروي.
طالبانو په تېرو څلورو کلونو کې پر رسنیو د محدودیتونو پلي کولو سره لسګونه رسنۍ ودرولې او لسګونه خبریالان، فعالان او د رسنیو کارکوونکي یې نیولي او زنداني کړي دي.
د افغانستان د خبریالانو مرکز د شمېرو له مخې، په کابل، غزني او پروان کې، لږ تر لږه شپږ خبریالان د طالبانو په زندانونو کې دي.
