د افغانستان پخواني ولسمشر حامد کرزي د ښوونکي نړیوالې ورځې په مناسبت ویلي، تمه لري چې په هېواد کې و ټولو نجونو او هلکانو ته د زده کړو برابر فرصتونه برابر کړای شي.
رخشانه: ښاغلي کرزي نن (یکشنبې د تلې ۱۳ مه) پر خپله فسبوک پاڼه د یوه پوسټ په خپرولو سره د ښوونکي نړیوالې ورځ ټولو په ځانګړې توګه ښځینه ښوونکو ته مبارکي ویلي او د هغو له هڅو او کړاونو یې ستاینه کړې ده.
هغه لیکلي: «ښکاره ده، چې په افغانستان کې ښوونکي له ستړیا، ستونزو، اقتصادي فشارونو او سرچینو له کموالي سره سره د هېواد د بچیانو د زده کړو او تربیې لپاره هڅې کوي او خپلې دندې په ژمنتیا او بشپړې ریښتینولۍ سره تر سره کوي.«
ښاغلي کرزي تمه ښودلې، چې ژر تر ژره د هېواد د ټولو نجونو او هلکانو لپاره د زده کړو پراخ فرصتونه برابر شي، تر څو هغوی وکولی شي خپل خوبونه رښتیا کړي او هېواد د هوساینې او پراختیا په لور بوځي.
هغه ټینګار کړی، چې د ښوونکو د سرښندنو او هڅو په ترڅ کې د هېواد بچیان د علم لوړو پوړونو ته رسېدای شي او کولی شي خپل ځان، کورنۍ او ټولنې ته د خدمت وړ وګرځي.
کابل کې د اروپايي ټولنې دفتر هم پر خپله اېکس پاڼه د یوه پوسټ په خپرولو سره لیکلي، چې زده کړې د ټولو لپاره، د یوه پیاوړي او پر ځان بسیا افغانستان لپاره کیلي ده، چې اقتصادي پراختیا پیاوړې کوي.
دغه بنسټ د افغانستان د ټولو، په ځانګړې توګه د ښځینه ښوونکو نه ستړېدونکې هڅې ستایلې او هرکلی یې کړی دی.
د اکتوبر پنځمه د ښوونکي نړیواله ورځ نمول شوې ده. له همدې امله په ټوله نړۍ کې لمانځل کېږي، خو طالبانو امر کړی، چې دغه ورځ دې په هېواد کې نه لمانځل کېږي.
طالبانو په تېرو څلورو کلونو کې له شپږم ټولګي پورته نجونو پر مخ د ښوونځیو دروازې تړلې او په دې سره یې په ټول هېواد کې زرګونه ښځینه ښوونکې بې کاره او په کور کېنولې دي.
