سرپل کې سیمه ییزه سرچینې وايي، د دې ولایت په سانچارک ولسوالۍ کې یوې ځوانې نجلۍ، د خپل مین له وژل کېدو وروسته ځان وژنه کړې ده.
رخشانه: سرپل کې لږ تر لږه درې سیمه ییزه سرچینو رخشانې رسنۍ ته ویلي، دغې ځوانې نجلۍ تېره ورځ (شنبې د تلې ۱۲ مه) د سانچارک ولسوالۍ په «تکزاز» کلي کې ځان وژنه کړې ده.
د سرچینې په وینا، دغه ځوانه نجلۍ صفیه نومېده او شاوخوا ۱۷ کاله عمر یې درلود.
سرچینې زیاته کړې، دغې ځوانې نجلۍ وروسته له هغې، چې ورور یې مین و واژه، په خپل کور کې ځان راځړولی دی.
صفیې د احمد وکیل په نوم د یوه هلک سره تلېفوني اړیکه درلوده او دغه هلک د جمعې په ورځ د (تلې ۱۱ مه) د سانچارک په بازار کې د صفیې د ورور له خوا د چاقو په ګزارونو و وژل شو.
د سرچینو د معلوماتو پر بنسټ، طالبانو د دې پېښې په تړاو د صفیې پلار او مشر ورور نیولي دي.
تر اوسه سرپل کې ځايي طالب چارواکو په دې اړه څه نه دي ویلي.
