پنجشېر کې د طالبانو د اطلاعاتو او کتلور ریاست، په دغه ولایت کې په خوارځواکۍ د اخته کابو شپږ زره ماشومانو او امیدواره ښځو د ثبتېدو خبر ورکړی دی.
رخشانه: دغه ریاست نن (سه شنبې د تلې ۱۵ مه) په یوه خبرپاڼه کې لیکلي، د روان کال په لومړیو شپږو میاشتو کې په پنجشېر کې ۵ زره او ۹۲۵ تنه په خوارځواکۍ اخته شوي دي.
پنجشېر کې د طالبانو د عامې روغتیا رییس ډاکتر حجت الله محمدي ویلي، له دې ډلې ۴ زره او ۲۴۴ تنه ماشومان او یو زر او ۶۸۱ امیدواره ښځې دي.
په پنجشېر کې د طالبانو د عامې روغتیا د رییس په وینا، ماشوم په سخته او متوسطه خوارځواکۍ اخته شوي دي.
هغه زیاته کړې، چې په خوارځواکۍ کابو ۳ زره او ۶۳۹ تنه ماشومان درملنه شوي او پاتې نور د درملنې په حالت کې دي، او په خوارځواکۍ اخته امیدواره مېرمنې هم تر روغتیايي څار لاندې دي.
څه موده وړاندې، په افغانستان کې د خوړو نړوال سازمان (WFP) اعلان کړی وو، چې افغانستان کې شاوخوا ۴.۷ میلیونه ښځې او ماشومان په خوارځواکۍ اخته شوي دي.
دغه بنسټ ویلي وو، چې افغانستان کې ۹.۵ میلیون تنه د خوړو له سخت نه خوندیتوب سره مخ دي.
بهرنیو بنسټونو په وار وار خبرداری ورکړی، چې افغانستان د خوارځواکۍ له زیاتېدونکي ناورین سره لاس او ګرېوان دی.
له ایران او پاکستان څخه د ګډوالو اجباري راستنېدا، سخته وچکالي او د بشري مرستو بې درېغه کمښت په هېواد کې دغه ناورین زیات کړی دی.
