د افغانستان د ښځو لپاره د ولسي محکمې څارنواله بنفشه یعقوبي وايي، د طالبانو تر واک لاندې افغانستان کې ښځې په وېره کې ژوند کوي او نجونې د ښوونځیو د دروازو پرانستل کېدو په هیله دي.
رخشانه: هغې دغه څرګندونې نن (چهارشنبې د تلې ۱۶ مه) د یادې محکمې په لومړۍ غونډه کې، چې د آسپانیا په مادرید ښار کې پیل شوې، مطرح کړې ده.
مېرمن یعقوبي د افغانستان د ښځو لپاره د ولسي محکمې په لومړۍ ناسته کې د خپلې وینا پر مهال و ویل، طالبان د ښځو په ځپلو سره د افغانستان د نیمايي وګړو د لرې کولو په لټه کې دي.
هغې د ښځو او نجونو د حقونو او اساسي خپلواکیو پر وړاندې د طالبانو پراخو محدودیتونو ته په اشارې ویلي، دغې ډلې« له ښځو ژوند تروړلی دی.»
د افغانستان د ښځو لپاره د ولسي محکمې څارنوالې زیاته کړې، د طالبانو تر واک لاندې افغانستان ژورو تیارو ته ټېل وهل شوی دی.
نوموړې په ټینګار سره وايي، سره له دې لاسوندونو، چې افغانستان کې ښځې د طالبانو تر ځپلو لاندې دي، د بشري حقونو مدافع بنسټونو او نړیوالې ټولنې د هغوی ځپل له پامه غورځولي دي.
مېرمن یعقوبي په افغانستان کې د طالبانو له لوري د ښځو او نجونو پر وړاندې پراخ جنایتونه او محدودیتونه « د انسانیت پر وړاندې جرم» وباله او په افغانستان کې یې د جرم په توګه د جنستي توپیر د په رسمیت پېژندنې غوښتنه وکړه.
هغې همدارنګه له نړیوالې ټولنې وغوښتل، چې د افغان ښځو تر څنګ ودرېږي او له هغوی د «لمنځه تللي عدالت» د بېرته تر لاسه کولو لپاره ملاتړ وکړي.
د افغان ښځو لپاره د ولسي محکمې د جوړېدو موخه د طالبانو له بیا واک ته رسېدو وروسته، د ښځو د حقونو څخه د سرغړونو څېړل او مستند کول دي.
د رواداری بنسټ مشرې او د دې محکمې یوې جوړونکې شهزاد اکبر په خپله پیلیزه وینا کې و ویل، د دې محکمې د ترسره کولو هدف، د جرمونو د عادي کولو سره مبارزه او د ښځینه قربانیانو لپاره د یوه بستر رامنځ ته کول دي، تر څو د بشري حقونو د سازمان شویو سرغړونو بیان وکړي.
د افغان ښځو لپاره ولسي محکمه د مدني او بشري حقونو د بنسټونو، «روادارۍ»، بشري حقونو موسسې او د افغانستان دموکراسۍ، د څېړلو او پراختیا بنسټ او د بشري حقونو د مدافعانو ټولنې» په نوښت جوړه شوې ده.
