د رواداری په نوم د بشري حقونو بنسټ اعلان وکړ، چې د افغان ښځو لپاره د ولسي محکمې لومړۍ ناسته په آسپانیا کې پیل شوه.
رخشانه: رواداري ویلي، د دې محکمې لومړۍ ناسته نن (چهارشنبې د تلې ۱۶ مه) د آسپانیا په مادرید ښار کې پیل شوې ده.
د دې بنسټ د اعلامیې له مخې، د دې ولسي محکمې د جوړېدو موخه د طالبانو بیا واک ته رسېدو وروسته په افغانستان کې د ښځو د حقونو د سرغړونو، څېړل او مستند کول دي.
د رواداری بنسټ مشرې او د دې محکمې یوې جوړونکې شهزاد اکبر په خپله پیلیزه وینا کې و ویل، د دې محکمې د ترسره کولو هدف، د جرمونو د عادي کولو سره مبارزه او د ښځینه قربانیانو لپاره د یوه بستر رامنځ ته کول دي، تر څو د بشري حقونو د سازمان شویو سرغړونو بیان وکړي.
د مېرمن اکبر په وینا، افغان ښځو او نجونو په تېرو څو لسیزو کې جنسیتي توپیر او تاوتریخوالی تجربه کړی او دا محکمه د هغوی لپاره یو فرصت دی، تر څو یې غږ واورېدل شي.
هغې په خپلو خبرو کې زیاته کړه، دغه محکمه له کلونو هلو ځلو وروسته جوړېږي، چې «د افغان ښځو او نجونو پر وړاندې ظلم او جنسیتي تېری اصلي محور» دی.
د روادارۍ بشري حقونو بنسټ رییسې افغانستان کې د ښځو او نجونو حقونو او اساسي خپلواکیو ته په اشارې وايي، دغه محدودیتونه د طالبانو د نرواکي نظام له خوا پلي شوي، چې د «جنستي توپیر» بشپړه بېلګه ده.
مېرمن اکبر تایید کړه، چې طالبانو تر واک لاندې افغانستان کې به د تاوتریخوالي د قربانیانو غږ غلی نه شي. د هغې په وینا، ښځې به په افغانستان کې عدالت ته د لاسرسي برخه کې له خپل مقاومت نه لاس په سر نه شي.
د رواداری رییسې د خپلو خبرو پر دوام زیاته کړه، دغه محکمه د قربانیانو د کیسو، لاسوندونو او راټولو شویو مستندونو پر بنسټ جوړېږي او د طالبانو ټول جنایتونه مستند کړای شوي دي.
هغې د خپلو خبرو په پای کې له نړیوالې ټولنې وغوښتل، چې د طالبانو د «جنایتونو د عادي کولو او د افغان ښځو تر څنګ د درېدو» څخه یو وټاکي.
د افغان ښځو لپاره ولسي محکمه د مدني او بشري حقونو د بنسټونو، «روادارۍ»، بشري حقونو موسسې او د افغانستان دموکراسۍ، د څېړلو او پراختیا بنسټ او د بشري حقونو د مدافعانو ټولنې» په نوښت جوړه شوې ده.
روادارۍ څه موده وړاندې ویلي وو، چې دغه محکمه به «د نړیوالو قوانینو، اصولو او معیارونو په چوکاټ کې، د څارنوالانو او ښځینه قربانیانو د بیانونو او څېړونکو له خوا د چمتو کړای شویو شواهدو پر اساس د طالبانو د جنستي توپیر پر بنسټ د ربړونکي سیستم ارزونه وکړي.»
