د افغان ښځو لپاره د ولسي محکمې په لومړۍ ناسته کې، یو شمېر معترضو مېرمنو، چې د طالبانو له خوا نیول شوې او ربړول شوې وې، ټکان ورکوونکې کیسې وړاندې کړې.
رخشانه: پروانې ابراهیم خېل نن (چهارشنبې د تلې ۱۶ مه) په خپلو څرګندونو کې و ویل، طالبانو د دې په خاطر چې د ښځو اعتراضي پروګرامونه یې لارښود کړي وو، د دې د سنګسارولو حکم صادر کړی وو.
د افغان ښځو لپاره د ولسي محکمې لومړۍ غونډه د طالبانو جنایتونو ته د رسېدو په خاطر د آسپانیا په مادرید ښار کې جوړه شوې وه.
ابراهیم خېل په دې ناسته کې شاهدي ورکړه، چې طالبانو د دې د خور خاوند هم د خپلو ماشومانو پر وړاندې ونیوه، او لس کلن خوریی یې د دې لپاره برمته کړی وو تر څو هغه هم ونیسي.
د دې معترضې مېرمنې په وینا، طالبانو د دې د خور خاوند چې له دې سره یو ځای نیول شوی وو، هم په سنګسار محکوم کړی وو.
هغې زیاته کړه، د طالبانو په زندان کې یې د سنګسار حکم له اورېدو وروسته هیله درلوده، چې نوره ژوندۍ پاتې نه شي او څو ځلې یې په زندان کې د ځان وژنې هڅه کړې وه.
ابراهیم خېل و ویل: «طالبانو زه تورنه کړې وم، چې مسلمانه نه یم، او د دوی پر ضد اعتراض لپاره د ملګرو ملتونو له بنسټونو او بهرنیو هېوادونو پیسې او امر تر لاسه کوم.»
په ورته وخت یوې بلې معترضې ښځې هم چې د افغان ښځو لپاره د ولسي محکمې په غونډه کې د عیني شاهد په توګه شتون درلود ویلي، طالبانو معترضه مېرمنې په ځانمرګو بریدونو ګواښلې وې.
دغې معترضې مېرمنې چې د امنیتي ننګونو له امله یې هویت څرګند نه کړ و ویل، طالبانو له دې سره اړیکه نیوله او ورته ویل یې چې «موږ د معترضانو په منځ کې ځانمرګی برید کوو او هر څوک چې و وژل شول، مسوول یې تاسو یاستۍ.»
دغې معترضې مېرمنې زیاته کړې، بالاخره طالبانو دا په کابل ښار کې له خپل کار ځای څخه ونیوه او همکاران یې وګواښل، چې د طالبانو له لوري د هغې د نیولو پېښه رسنیزه نه کړي.
هغې ویلي، د طالبانو په زندان کې د ټوپک په کنداغ، سوکانو او لغتو ربړونل شوې او د دې ربړونې په ترڅ کې یې ملا زیان لیدلی او پوښتۍ یې ماتې شوې دي.
د هغې په وینا، طالبانو د پلټنو پر مهال د دې د کورنۍ د غړو د عکسونو په ښودلو او د هغوی په مرګ ګواښلو سره دا په روحي ډول ربړولې ده.
دې معترضې مېرمنې دا هم زیاته کړې، چې طالبانو په وار وار دې ته د «فاحشې» خطاب کړی، قوم او ژبې ته یې سپکاوی کړی او ویل یې چې د کورنۍ نارینه یې «بې غیرته» دي. ښځې باید په کور کېني او اولادونه وروزي.
دغې معترضه مېرمن وايي، طالبانو په زندان کې دې ته یو کتاب راوړ، چې په هغې کې د دې ډلې د مشر د هبت الله اخوندزاده او داعش ډلې د مشر ابوبکر البغدادي نومونه وو او ویل یې له دې دوه تنو باید له یوه سره «بیعت» وکړې.
هغې په دې ناسته کې شاهدي ورکړه، چې طالبانو دا په زندان کې دې ته هڅوله، چې تشناب او اوبو ته له لاس رسي پرته، قران و وايي او لمونځ وکړي.
د دې معترضې مېرمنې په وینا، دا د خپلې کورنۍ په تضمین او د ضمانت په توګه، د څو سوداګریزو مرکزونو د جواز په ورکړې سره خوشې او بالاخره له افغانستان څخه ووته.
هغې د افغانستان د ښځو لپاره له ولسي محکمې وغوښتل، چې د طالبانو جنایتونه په ځير سره وڅېړي او د افغان ښځو په حق کې عدالت تامین کړي.
