د روغتیا نړیوال سازمان (WHO) وايي، د افغانستان په ۱۷ ولایتونو کې د شري ناروغۍ سره د مبارزې په لړۍ کې، ۸.۹ میلیونه ماشومانو ته واکسین ورکړل شو.
رخشانه: دغه بنسټ نن (پنشنبې د تلې ۱۷ مه) د یوه راپور په خپرولو سره په افغانستان کې د شري سره د مبارزې لومړۍ لړۍ بریالۍ وبلله.
د روغتیا نړیوال سازمان ویلي، په لومړي کمپاین کې له شپږ میاشتنیو تر لس کلنو پورې کابو ۸.۹ میلیونه ماشومانو ته د هېواد په ۱۷ ولایتونو کې واکسین ورکړل شو.
شری یو له خورا ساري ناروغیو او د ماشومانو په منځ کې د واکسین په واسطه د مخنیوي وړ مړینې یو مخکښ لامل دی.
د روغتیا نړیوال سازمان وايي، په افغانستان کې هغه ځای چې د واکسیناسیون ته لاسرسی په کې محدود دي او ډېری ماشومان په کې له نورو ناروغیو، لکه خوراځواکۍ سره مخ دي، په شري اخته کېدل کولی شي، شدید زیانونه لکه سینه بغل، ړوندوالی او ان مرګ له ځان سره ولري.
دغه بنسټ زیاته کړې، چې په ۲۰۲۴ کال کې له ۹۳۰۰ زیاتې د شري پېښې په ټول هېواد کې ثبت شوې. د روان میلادي کال تر اګست میاشتې پورې ۸۵۰۰ نورې پېښې هم پرې ور زیاتې شوې، چې پرې اخته ۹۲ سلنه ماشومان له لس کلنۍ څخه کم عمره دي.
د روغتیا نړیوال سازمان ویلي، د شري واکسین د ملي کمپاین له پیل وړاندې، یوازې ۵۵ سلنه ماشومان د واکسین لومړي دوز او ۴۴ سلنه نور د واکسین دویم دوز تر لاسه کړی وو، چې د دې زماني واټن له امله، ګڼ شمېر ماشومان خوندي نه وو او د ناروغۍ د خپرېدل پراخ شوي وو.
په افغانستان کې د روغتیا نړیوال سازمان استازي ډاکتر ادوین سنیز سالوادور ویلي، شری یوه مرګونې خو د مخنیوي وکړ ناروغي ده او د افغانستان په شان هېوادونو کې ډېری شمېر زیانمنونکي ماشومان لپاره واکسین ژغورونکی دی.
هغه زیاته کړې: «د دې ملي کمپاین په لومړي پړاو کې بریالیتوب د میلیونونو ماشومانو د ناروغۍ، معلولیت او مړینې څخه د ساتنې په لور یو مهم ګام دی.»
د روغتیا نړیوال سازمان دغه راز ژمنه کړې، چې د افغانستان له روغتیايي نظام څخه به ملاتړ کوي، تر څو په دې هېواد کې هېڅ یو ماشوم له واکسین څخه پاتې نه شي.
په افغانستان کې د ملګرو ملتونو د ماشومانو د ملاتړ صندوق (یونیسف) استازي هم ویلي چې «په افغانستان کې هېڅ یو ماشوم باید له ناروغۍ چې مخنیوی یې معلوم دی، مړ نه شي.»
هغه ویلي: «دغه ملي کمپاین په دوه پړاونو کې جوړ شوی، چې لږ تر لږه ۹۵ سلنه له شپږو میاشتو تر لس کلنو پورې ماشومان رانغاړي او هغه ماشومان چې په مخکني پړاو کې واکسین شوي، په نښه او واکسین یې کړي.»
د شري د واکسین د ملي کمپاین لومړی پړاو د هېواد په ۱۷ ولایتونو کې د روغتیا نړیوال سازمان، د ملګرو ملتونو د ماشومانو د ملاتړ صندوق (یونیسف) او د دې سازمان د نورو شریکانو په ملاتړ پلی شوی دی.
