په افغانستان کې د ملګرو ملتونو سازمان د ښځو څانګې ځانګړې استازې سوزان فرګوسن د نجونو د نړیوالۍ ورځې په مناسبت وايي، دا هېواد د نجونو لپاره یو له تر ټولو بدو ځایونو څخه دی.
رخشانه: د ملګرو ملتونو د ښځو څانګې نن (شنبې د تلې ۱۹ مه) په خپله اېکس پاڼه د یوه پوسټ په خپرولو سره لیکلي چې «موږ (ملګري ملتونه) نه باید د افغانستان د نجونو یوه بشپړ نسل ته شا کړو.»
د ملګرو ملتونو د ښځو څانګې ځانګړې استازې ټینګار کړي، چې افغانستان کې نجونې د محدودیتونو سره سره، لا هم لوی خوبونه او ټینګ هوډ لري.
مېرمن فرګوس ویلي، باید همداسې د افغان نجونو تر څنګ ودرېږو او د هغوی د ځواکمنولو لپاره پانګونه وکړو.
هغې زیاته کړې: «راځۍ هغوی ته وښیو، چې نړۍ یې لا هم غږونه اوري او موږ به د هغوی تر څنګ ودرېږو.»
طالبانو په تېرو څلورو کلونو کې د پراخو محدودیتونو په لګولو سره، په افغانستان کې ښځې او نجونې خپلو حقونو او خپلواکیو ته له لاسرسي محرومې کړې دي.
دغه راز دغې ډلې واک ته له بیا رسېدو وروسته، له شپږم ټولګي پورته نجونو پر مخ د ښوونځیو دروازې وتړلې او په پوهنتونو کې یې د هغوی زده کړې منع کړې.
د اکتوبر یوولسمه د ملګرو ملتونو له خوا د لور د نړیوالې ورځې په نوم نومول شوې ده او هر کال له دغه ورځې په یو شمېر هېوادونو کې لمانځه کېږي.
په دې ورځ ډېری مهم مسایل، لکه زده کړې، روغتیا، کم عمرونه ودونه، جنسي تاوتریخوالی او ټولې نورې ستونزې، چې نجونې په ډېری هېوادونو په ځانګړې توګه په محرومو سیمو کې له هغو سره مخ دي، د پام وړ ګرځي.
