په افغانستان کې د ملګرو ملتونو د ماشومانو د ملاتړ صندوق اعلان کړي، چې په دغه هېواد کې ښوونیز نظام له لویو ستونزو سره مخ دی، خو د بیارغونې فرصت لا هم شته دی.
رخشانه: یاد بنسټ نن (شنبې د تلې ۱۹ مه) پر خپله اېکس پاڼه د یوه پوسټ په خپرولو سره لیکلي، له نجونو د زده کړو محدودیت لرې کول خورا اړین دی.
یونیسف د لومړنیو زده کړو په برخه کې د هرې نجلۍ او هلک لپاره پانګونه مهمه او حیاتي بللې ده.
۱۴۹۵ ورځې کېږي، چې طالبانو د ښوونځیو دروازې له شپږم ټولګي پورته نجونو پر مخ تړلې او دغه راز یې په دولتي او خصوصي پوهنتونونو کې د نجونو د تحصیل مخنیوی کړی دی.
د طالبانو له لوري د دې محدودیتونو له لګولو وروسته ډېری زده کوونکو نجونو په انلاین ټولګیو کې زده کړې تر لاسه کولې.
خو طالبانو په تازه قضیه کې د هېواد په ۱۴ ولایتونو کې د نوري فایبر او وای فای انټرنېټ ته د کاروونکو لاسرسی پرې کړی، چې دغه محدودیتونه د دې لامل شوي، تر څو لسګونه زره زده کوونکي په ځانګړې توګه نجونې له انلاین زده کړو محرومې شي.
یونیسف څه موده وړاندې اعلان کړی وو، چې په افغانستان کې له شپږم ټولګی پورته، له زده کړو د نجونو محرومیت د «د رواني ناروغیو، کم عمره ودونو او د ماشومان تر منځ د زېږون» د زیاتوالي لامل شوی دی.
دغه بنسټ ویلي وو، د ۲۰۲۵ میلادي کال تر پای پورې به له ۲.۲ میلیونه زیاتې نجونې په افغانستان کې له زده کړو بې برخې شي.
یونیسف له زده کړو د نجونو محرومیت بې عدالي بللې ویلي یې وو، چې دغه ممنوعیت د هېواد پر ثبات او پرمختګ ژورې ګواښوونکې او اودمهالې اغېزې لري.
