هندي رسنیو راپور ورکړی، چې د طالبانو د بهرنیو چارو وزیر امیرخان متقي اړ شو، د هند د دولت په غوښتنه، د ښځینه خبریالانو په شتون کې بله خبري ناسته جوړه کړي.
رخشانه: دغه خبري ناسته نن (یکشنبې د تلې ۲۰ مه) د ښځینه خبریالانو په شتون، نوي ډیلي کې د طالبانو تر واک لاندې افغانستان په سفارت کې جوړه شوه.
د نن ورځې خبري ناسته د هند د بهرنیو چارو وزارت په امر او دوه ورځې وړاندې په نوي ډيلي کې، د طالبانو د بهرنیو چارو وزیر په خبري ناسته کې د ښځينه خبریالانو له مخنیوي وروسته جوړ شو.
امیرخان متقي د نن ورځې په «ټولګډونه» خبري ناسته کې، د وړمې ورځې په ناسته کې د ښځینه خبریالانو د مخنیوي په اړه توضیحات ورکړل.
د نن ورځې په خبري ناسته کې ګن شمېر ښځینه خبریالانې تر سترګو کېدې.
متقي په دې ناسته کې ویلي، چې دوه ورځې وړاندې خبري ناسته یې له دقیق پروګرام پرته او په بېړه جوړه شوې وه او یوازې کم شمېر خبریالان ورته رابلل شوي وو.
د طالبانو د بهرنیو چارو وزیر په مخکنۍ خبري ناسته کې د ښځینه خبریالانو د ګډون مخنیوی کړی وو، چې دغه اقدام د دې هېواد د سیاستوالو، خبریالانو او بشري حقونو د فعالانو غبرګونونه راپارولي وو.
هندي سیاسي فعالانو او خبریالانو د طالبانو د بهرنیو چارو وزیر د ښځو په ځپلو تورن کړ او د هغه دا کار یې د دې هېواد ښځو ته سپکاوی وباله.
دا په داسې حال کې ده، چې په هېواد کې د ننه ښځینه خبریالانې د طالبانو ډلې د ښځو ضد سیاسیتونو او پراخو محدودیتونو سره مخ دي. په وار وار د طالبانو په خبري ناستو کې د ښځینه خبریالانو غږ او انځور سانسور شوی دی.
