د افغانستان د خبریالانو مرکز (AFJC) اعلان کړی، چې پکتیا کې د طالبانو تر واک لاندې ملي رادیو تلوېزیون خبریال عبدالغفور عابد وژل شوی دی.
رخشانه: دغه مرکز ویلي، ښاغلی عابد نن (چهارشنبې د تلې ۲۳ مه) د طالبانو او پاکستاني ځواکونو تر منځ جګړې د خبري پوښښ لپاره د خوست ولایت ځاځي میدان ولسوالۍ ته تللی وو، چې و وژل شو.
پکتیا کې د ملي راډیو د خپرونو مدیزر تواب آرمان هم له خپل موټر چلوونکي سره په دې جګړه کې ټپي شوی دی.
ښاغلی ارمان او موټر چلوونکی یې د درملنې لپاره د خوست یوه روغتون ته وړل شوي دي.
د افغانستان د خبریالانو مرکز ویلي، دغه خبریالان د اړتیا وړ خوندیتوب توکو پرته سیمې ته تللي وو.
د عبدالغفور عابد مړی د ښخولو لپاره د خوست څخه پکتیا ولایت ته لېږدول شوی دی.
د طالبانو او پاکستان د ځواکونو تر منځ د روانې اوونۍ د شنبې په شپه د څو ساعتونو لپاره پر ډېورنډ کرښه جګړه رامنځ ته شوه.
د طالبانو ویاند ذبیح الله مجاهد نن سهار اعلان وکړ، چې د دوی او د پاکستان د ځواکونو تر منځ نښتو په ترڅ کې د کندهار په سپین بولدک ولسوالۍ کې لږ تر لږه ۱۲ تنه ملکي وګړي وژل شوي او له ۱۰۰ زیات ټپیان شوي دي.
د طالبانو او پاکستان تر منځ نښتو له امله د دواړو هېوادونو تر منځ پولې له څلورو ورځو راهیسې تړل شوې دي.
