بادغېس کې سیمه ییز طالب چارواکي وايي، سبا (پنشنبې د تلې ۲۴ مه) به د دغه ولایت په مرکز شهر قلعه نو کې یو تن په عام محضر کې اعدام کړي.
رخشانه: بادغېس کې د طالبانو د امنیه قوماندانۍ ویاند صدیق الله صدیقي نن (چهارشنبې د تلې ۲۳ مه) په خپله اېکس پاڼه د یوه پوسټ په خپرولو سره ویلي، دغه کس به سبا ۷:۰۰ بجې د دې ولایت د مرکز قلعه نور ښار په سپورتي لوبغالي کې اعدام شي.
بادغېس کې د طالبانو د امنیه قوماندانۍ ویاند زیاته کړې، دغه کس د «ټولو بشپړو شرغي موازینو او قوانینو په رعایت» کولو سره اعدامېږي.
هغه د دې ولایت له اوسېدونکو غوښتي، چې د حکم پلي کولو ځای ته ورشي، خو د «تلېفونونو او هر ډول انځور اخیستونکو وسایلو راوړلو څخه ډډه وکړي.»
طالبانو نه ده معلومه کړې، چې دغه کس په کوم جرم په دار ځړول کېږي.
دغې ډلې څه موده وړاندې اعلان کړی وو، چې یو تن یې په پکتیکا ولایت کې د خلکو پر وړاندې په اعدام محکوم کړی وو.
طالبانو ویلي وو، دغه کس «اسلامي مقدساتو او شریعت په ځانګړې توګه حضرت محمد ص» ته په سپکاوي په اعدام محکوم شوی دی.
د طالبانو ډلې د روان لمریز کال په وري میاشت کې په فرا، بادغېس او نیمروز ولایتونو کې څلور تنه په بېلا بېلو تورونو د خلکو پر وړاندې اعدام کړي وو.
دغې ډلې په تېرو شاوخوا څلورو کلونو کې د هېواد په یو شمېر ولایتونو کې لس تنه د بېلا بېلو تورونو له امله په عام محضر کې اعدام کړي دي.
