افغانستان کې د ملګرو ملتونو سیاسي استازولۍ (یوناما) وايي، په دې وروستیو څو ورځو کې د طالبانو او پاکستان تر منځ نښتو کې، د ښځو او ماشومانو په ګډون لږ تر لږه ۱۸ تنه وژل شوي دي.
رخشانه: یاد بنسټ نن (پنشنبې د تلې ۲۴ مه) پر خپله فسبوک پاڼه د یوه پوسټ په خپرولو سره لیکلي، چې د طالبانو او پاکستان تر منځ جګړو څخه یې د ملکي وګړو د درندې مرګ ژوبلې کره راپورونه تر لاسه کړي دي.
یوناما لیکلي «د روان لمریز کال د اکتوبر له ۱۰ مې راپدېخوا د دواړو لورو تر منځ په پوله وسله والې نښتې د پام وړ زیاتوالی کړی او د ګڼ شمېر ملکي وګړو د مرګ ژوبلې سبب شوې دي.»
دغه بنسټ ویلي، پولې ته نېږدې د کندهار په سپین بولدک کې د طالبانو او پاکستان تر منځ په نښتو کې د ښځو او ماشومانو په ګډون ۱۷ تنه ملکي وګړي وژل شوي او ۳۴۶ نور ټپیان شوي دي او په پکتیکا، پکتیا، کنړ او هلمند کې هم د یوه کس وژل کېدل او د ۱۵ نورو ټپي کېدل ثبت شوي دي.
طالبانو تېره ورځ اعلان وکړ، چې د کندهار ولایت په سپین بولدک ولسوالۍ کې له پاکستاني ځواکونو سره د دوی د جنګیالیو په نښتو کې لږ تر لږه ۱۲ ملکي وګړي وژل شوي او له ۱۰۰ زیات ټپیان شوي دي.
په افغانستان کې د ملګرو ملتونو سیاسي استازولۍ د طالبانو او پاکستاني لوري تر منځ د اوربند هرکلی کړی او له دواړو لورو یې غوښتي، چې شخړو ته د پای ټکی کېږدي.
دغه بنسټ ټینګار کړی، چې د نړیوالو قوانینو پر اساس د جګړې لوري باید «توپیر کلیدي اصول، تناسب، او د ملکي تلفاتو د مخینوي لپاره احتیاط کول رعایت کړي.»
طالبانو پرون مازیګر اعلان وکړ، چې نامعلومې مودې او تر «هغه چې تېری نه وي لیدل شوی» د دې ډلې او پاکستان تر منځ اوربند شوی دی.
د طالبانو او پاکستان ځواکونه د روانې اوونۍ د شنبې په شپه د دواړو هېوادونو تر منځ پوله کې د څو ساعتونو لپاره سره ونښتل. د دې نښتو په پایله کې د دواړو هېوادونو تر منځ پولې له تېرو څو ورځو راهیسې تړل شوې دي.
