طالبانو روانه اوونۍ په لغمان، زابل او بلخ ولایتونو کې، د یوې ښځې په ګډون ۱۱ تنه، د خلکو پر وړاندې په دورو وهلي دي.
رخشانه: دغه کسان د «لواطت، غلا، نامشروع اړیکې او کور څخه د تېښتې» په تورونو، په دغه درې ولایتونو کې په دورو وهلي دي.
یکشنبې د (تلې ۲۰ مه) شپږ تنه د «لواطت او غلا» په تور په لغمان ولایت کې د خلکو پر وړاندې ۳۹ دورې وهل شوي دي.
دغه کسان د محکمې د پرېکړې له مخې، په یو کال او شپږ میاشتې تر دوه کلونو پورې تنفذي بند باندې هم محکوم شوي دي.
دوشنبې د (تلې ۲۱ مه) یو تن د «نامشروع اړیکې» په تور د زابل ولایت په شاه جوی ولسوالۍ کې، د خلکو په وړاندې ۳۹ دورې وهل شوی او په دوه کاله تنفذي بند هم محکوم شوی دی.
سه شنبې د (تلې ۲۲ مه) یو تن د «لواطت» په تور د بلخ ولایت په البرز ولسوالۍ کې، د خلکو پر وړاندې ۳۹ دورې و وهل شو. خو معلومه نه ده، چې دغه کس په څومره بند محکوم شوی دی.
چهارشنبې د (تلې ۲۳ مه) د یوې ښځې په ګډون درې تنه له «کوره د تېښتې او غلا» په تور، د لغمان ولایت په الیشنګ ولسوالۍ کې د خلکو پر وړاندې ۳۹ دورې وهلې دي.
دغه کسان د لغمان الیشنګ کې د طالبانو د ابتدايي محکمې له خوا، په یوه کال او یوه کال او شپږ میاشتو تنفذي بند باندې هم محکوم شوي دي.
طالبانو تېرې اوونۍ په جریان کې د څلورو ښځو په ګډون ۲۴ تنه د بېلا بېلو تورونو له امله، د هېواد په شپږو ولایتونو کې د خلکو پر وړاندې په دورو وهلي وو.
