د طالبانو سترې محکمې اعلان کړی، چې په بادغېس کې یې یو تن د عمدي قتل په تور، د خلکو پر وړاندې د دې ولایت په مرکز قلعه نو ښار کې په دار کړ.
رخشانه: د طالبانو سترې محکمې نن «پنشنبې د تلې ۲۴ مه» د بادغېس مرکز قلعه نو ښار په سپورتي لوبغالي کې د یوه تن د اعدامولو خبر ورکړی دی.
د طالبانو سترې محکمې د اعدام شوي کس نوم اسماعیل د ابراهیم زوی او د بادغېس ولایت د جوند ولسوالۍ اوسېدونکی بللی دی.
هغه د بادغېس ولایت د جوند ولسوالۍ د اوسېدونکي دوست محمد د نورالدین زوی او د ګل برګ د لسمي د «ټوپک په واسطه په عمدي قتل» تورن وو.
بادغېس کې د طالبانو د امنیه قوماندانۍ ویاند تېره ورځ د دغه کس د اعدامېدو خبر ورکړی وو او ویلي یې ووو چې هغه به «دشرعي او قانوني موزینو په بشپړه رڼا» کې اعدام شي.
هغه د دې ولایت له اوسېدونکو غوښتي، چې د حکم پلي کولو ځای ته ورشي، خو د «تلېفونونو او هر ډول انځور اخیستونکو وسایلو راوړلو څخه ډډه وکړي.»
دغې ډلې څه موده وړاندې اعلان کړی وو، چې یو تن یې په پکتیکا ولایت کې د خلکو پر وړاندې په اعدام محکوم کړی وو.
د طالبانو ډلې د روان لمریز کال په وري میاشت کې په فرا، بادغېس او نیمروز ولایتونو کې څلور تنه په بېلا بېلو تورونو د خلکو پر وړاندې اعدام کړي وو.
دغې ډلې په تېرو شاوخوا څلورو کلونو کې د هېواد په یو شمېر ولایتونو کې لس تنه د بېلا بېلو تورونو له امله په عام محضر کې اعدام کړي دي.
