د خوړو نړیوالې ورځې سره سم افغانستان کې د بشري مرستو د همغږۍ دفتر (اوچا) وايي، د لوږې له ناورینه تر ډېره ښځو او ماشومانو زیان لیدلی دی.
رخشانه: دغه بنسټ نن (پنشنبې د تلې ۲۴ مه) پر خپله اېکس پاڼه د یوه پوسټ په خپرولو سره لیکلي، افغانستان په نړۍ کې یو له تر ټولو بدې لوږې له ناورین سره مخ دی.
د اوچا په خبره، ۹.۵ میلیونه وګړي سخت د خوړو له نه خوندیتوب سره مخ دي او له هرو ۵ ننو ۱ هغه یې نه پوهېږي، چې د راتلونکي څاښت خواړه به یې څه وي.
د بشري مرستو د همغږۍ دفتر وايي، ښځو او ماشومانو تر ټولو زیات زیان لیدلی دی.
دغه بنسټ په افغانستان کې په خوارځواکۍ د ملیونونو کسانو د اخته کېدو خبرداری ورکړی او اړمنو کسانو ته یې د «بېړنۍ بودجې» غوښتنه کړې ده.
ملګرو ملتونو هم د خوړو نړیوالې ورځې په تړاو ویلي چې «خواړه یو انساني حق دی نه یو امتیاز»
ملګرو ملتونو پورې تړلې اېکس پاڼې «د نړیوال اقدام بېړنۍ اړتیا په ګوته کوي، تر څو ډاډ تر لاسه شي، چې هر څوک، هر چېرې، کافي او مغذي خوړو ته لاسرسی ولري.»
د ملګرو ملتونو سرمنشي آنتونیو ګوترش هم پر خپله اېکس پاڼه د یوه پوسټ په خپرولو سره لیکلي، په ټوله نړۍ کې ۶۷۳ میلیونه کسان لا هم د شپې وږي ویده کېږي.
هغه د ټولغوښتنې په خپرولو سره «په پولو، سکتورونو او ټولنو کې د یووالي» غوښتنه کړې ده.
د خوړو نړیوال پروګرام څه موده وړاندې اعلان وکړو، چې افغانستان کې د لوږې ناورین ورځ تر بلې مخ په ژورېدو دی.
دغه بنسټ ویلي وو چې په راتلونکو شپږو میاشتو کې اړمنو کسانو ته د رسیدګۍ په پار ۵۳۹ میلیونه ډالرو ته «بېړنۍ» اړتیا ده.
د خوړو نړیوال پروګرام اټکل کړی وو، چې روان میلادي کال به په افغانستان کې تر ۵ کلونو کم عمره ۳.۵ میلیونه ماشومان په خوارځواکۍ اخته شي.
