ملګرو ملتونو (United Nations) اعلان کړی، چې هره دقیقه په نړۍ کې څلور ښځې د سینې سرطان په ناروغۍ اخته کېږي او یوه ښځه د دې ناروغۍ له امله ژوند له لاسه ورکوي.
رخشانه: په دې بنسټ پورې تړلې پاڼې نن ماښام (یکشنبې د تلې ۲۷ مه) په اېکس د یوې اعلامیې په خپرولو سره لیکلي، د اکتوبر میاشت «د سینې سرطان په اړه د پوهاوي میاشت ده.»
ملګرو ملتونو ویلي «سګرېټ نه څکول، د شرابو نه څښل یا کمول، له بدني پلوه فعال پاتې کېدل» په دې ناروغۍ د اخته کېدو ګواښ کموي.
په افغانستان کې د روغتیا نړیوال سازمان دفتر څه موده وړاندې په یوه راپور کې لیکلي وو، د دې هېواد د ښځو تر منځ تر ټولو ډېر سرطان، د سینې او رحم د خولې سرطان دی.
دغه سازمان ویلي وو، ډېری ناروغان یوازې د پرمختګ په وخت کې د خپلې ناروغۍ د درملنې په فکر کېږي، چې هغه وخت درملنه خورا کم اغېز لري.
د سینې سرطان د ښځو تر منخ یو له تر ټولو عامه ناروغي ده. دغه ناروغي هغه وخت رامنځ ته کېږي، چې د ښځو په سینه کې غیر طبیعي سلولونه په وده او خورېدو پیل وکړي او کولی شي د بدن و ټولو برخو ته پراختیا ومومي.
