د طالبانو له لوري په رسنیو کې د ساه کښو د انځور نه خپرولو محدودیت پر دوام، په هرات ولایت کې هم د ساه کښو انځور خپرول بند شول.
رخشانه: د افغانستان د خبریالانو مرکز نن (یکشنبې د تلې ۲۷ مه) په یوه اعلامیه کې لیکلي، دغه موضوع کابو میاشت وړاندې هرات کې د طالبانو د امربالمعروف ریاست له خوا د یو شمېر رسنیو د مسوولینو او سیمه ییزه یوټیوبرانو سره شریکه شوې او اوس په رسمي توګه پلې شوه.
هرات دوه ویشتم ولایت دی، چې په رسنیو کې یې د طالبانو له لوري، د ساه کښو په انځور خپرولو په رسمي توګه بندیز پلی کېږي.
د افغانستان د خبریالانو مرکز په اعلامیه کې راغلي، په هرات کې د ساه کښو انځور خپرولو تر بندیز وروسته، هرات کې د ملي تلوېزیون او لږ تر لږه دوه نورو خصوصي تلوېزیونونو خپرونې بندې شوې دي.
دغه مرکز لیکلي، د هرات ملي تلوېزیون د سختو فشارونو له امله، خپل ماهیت ته بدلون ورکړی او له یوې اوونۍ راهیسې په ټولینزو شبکو کې فعالیت لري او راپورونه یې په غږیزه او لیکلې بڼه خپرېږي.
د خبریالانو مرکز زیاته کړې، د هرات په سیمه ییزه رسنیو کې د ساه کښو انځور خپرولو مخنیوي، د دې ولایت پر نورو رسنیو هم منفي اغېز کړی او لږ تر لږه دوه نورو خصوصي تلوېزیونونو هم د ساه کښو انځور خپرول بند کړي او نورې رسنۍ هم په ډېره کمه کچه فعالیت کوي.
طالبانو په کندهار، تخار، بادغېس، هلمند، ننګرهار، نورستان، فراه، نیمروز، بدخشان، بغلان، جوزجان، زابل، پروان، کندوز، بامیان، دایکنډي، فاریاب، پنجشېر، لغمان، سرپل او بلخ ولایتونو کې په رسمي ډول په رسنیو کې د ساه کښو انځور خپرول بند کړي دي.
د خبریالانو مرکز په رسنیو کې د ساه کښو انځور په خپرولو بندیز د بیان د آزادۍ او خپلواکه رسنیو د بنسټیزو اصولو خلاف کار بللی دی.
دغه مرکز د آزادو رسنیو او خبریالانو په کار او معلوماتو ته د خلکو د لاسرسي په اړه، د دې محدویت د ناوړه پایلو په اړه خبرداری ورکړی دی.
د خبریالانو مرکز له طالبانو غوښتي، چې د دې محدودیتونو په لرې کولو سره د رسنیو د آزاد او وېرې پرته فعالیت لپاره زمینه برابره کړي.
طالبان په تېرو څلورو کلونو کې پر رسنیو او رسنیزو فعالیتونو د سختو محدودیتونو په لګولو سره د لسګونه غږیزه، تصویري او چاپي رسنیو د بندېدو لامل شوي دي.
دغې ډلې په دې موده کې لسګونه خبریالان، کارکوونکي او رسنیز فعالان نیولي او زنداني کړي دي.
