د افغانستان د بشري حقونو چارو کې د ملګرو ملتونو ځانګړي استازي ریچارډ بنټ وايي، د طالبانو له لوري د افرادو اعدامول او بدني سزاوې نه یوازې، د تاوتریخوالي وېرونکې بڼه ده، بلکې د خلکو د کنټرول او وېرې رامنځ ته کولو توکي هم بلل کېږي.
رخشانه: د ملګرو ملتونو د بشري حقونو شورا نن (چهارشنبې د تلې ۳۰ مه) له بنټ څخه په نقل د یوه پوسټ په خپرولو سره، په افغانستان کې د طالبانو له لوري د خلکو اعدامول او بدني سزاوې غندلې دي.
بنټ ویلي، د طالبانو له لوري د خلکو اعدامول «ظالمانه، غیر انساني او سپکوونکی» عمل دی.
هغه زیاته کړې، د طالبانو دا اقدام «په اغلب ډول ناعادلانه پلی کېږي او د جرم په مخنیوي کې کومه ګټه نه لري.»
بنټ ټینګار کړی، چې د خلکو اعدامول «نه یوازې محکوم کس له انسانیته وباسي، بلکې، هغه کسان هم سپکوي، چې د اعدام نندارې ته راځي.
طالبانو د تېرې اوونۍ د جمعې په ورځ په بادغېس ولایت کې یو کس چې د یوې ښځې او یوه سړي په وژلو تورن وو، په عام محضر کې په دار کړ. دغې ډلې د ۲۰۲۱ په اګست کې واک ته له بیا رسېدو وروسته، په څو ولایتونو کې لږ تر لږه ۱۱ تنه علني اعدام کړي دي.
د افغانستان د بشري حقونو د چارو لپاره د ملګرو ملتونو ځانګړي راپور ورکوونکي یو ځل بیا له طالبانو غوښتي، چې د خلکو اعدامول په بشپړه توګه بند کړي.
