طالبانو روانه اوونۍ په پکتیکا، فاریاب، غزني او کاپیسا ولایتونو کې شپږ تنه د بېلا بېلو تورونو له امله په دورو وهلي دي.
رخشانه: دغه کسان د «غلا، نامشروع اړیکې او اخلاقي فساد» په تورونو په دې څلورو ولایتونو کې د خلکو پر وړاندې په دورو وهلي دي.
یکشنبې د (تلې ۲۷ مه) دوه تنه د «غلا» په تور د پکتیکا ولایت په یوسف خېلو ولسوالۍ کې د خلکو پر وړاندې له ۳۳ تر ۳۹ دورې وهل شوي او په یوه نیم او دوه کالونو تنفذي بند محکوم شوي دي.
دوشنبې د (تلې ۲۸ مه) دوه تنه د «نامشروع اړیکې» په تور د فاریاب ولایت په پښتون کوټ ولسوالۍ کې د خلکو پر وړاندې ۳۹ دورې وهل شوي او په یوه کال تنفذي بند هم محکوم شوي دي.
سه شنبې د «تلې ۲۹ مه» یو تن د «غلا» په تور د غزني ولایت جاغوري ولسوالۍ کې د خلکو پر وړاندې ۳۹ دورې وهل شوی او ۱۲ کاله تنفذي بند هم ورته اورول شوی دی.
د چهارشنبې په ورځ د (تلې ۳۰ مه) یو تن د «نامشروع اړیکې او اخلاقي فساد» په تور د کاپیسا ولایت حصه اول کوهستان ولسوالۍ کې د خلکو پر وړاندې ۳۹ دورې وهل شوی دی.
معلومه نه ده، چې دغه کس په څومره وخت تنفذي بند محکوم شوی دی.
طالبانو اوونۍ وړاندې په لغمان، زابل او بلخ ولایتوو کې د یوې ښځې په ګډون ۱۱ تنه په بېلا بېلو تورونو د خلکو پر وړاندې په دورو وهلي وو.
دغه راز طالبانو تېره اوونۍ په شپږو ولایتونو کې د څلورو ښځو په ګډون ۲۴ تنه د بېلا بېلو تورونو له امله د خلکو پر وړاندې په دورو وهلي وو.
