د افغانستان یوه ځوانه نجلۍ، نیلا ابراهیمي د ۲۰۲۵ میلادي کال د دوامداره پراختیايي اهدافو (SDGs) د ځوانو رهبرانو پروګرام لپاره په وروستي نوملړ کې راغلې ده.
رخشانه: ملګرو ملتونو اعلان کړی، چې د روان کال په پیل کې د عامه غوښتنو وروسته، د نوم لیکنې لپاره دوی له ۱۵۰زیاتو هېوادونو څخه له ۳۳ زره زیات غوښتنلیکونه تر لاسه کړل، چې له دې ډلې ۱۷ کسان د نړۍ له ګوټ ګوټ څخه د دوامداره پراختیايي اهدافو (SDGs) لپاره د ځوانو رهبرانو په توګه غوره شول.
ملګرو ملتونو ویلي، دا ټول کسان د ۱۶ او ۳۳ کلونو ترمنځ عمر لري، چې په کې بنسټ اېښودونکي، ټولنیز فعالان، د سولې جوړونکي، او هغه متشبثین شامل دي، چې د دوامداره پراختیايي مسلو لکه د جنسیت برابري، بشري حقونو، د اقلیم بدلون، سولې او امنیت په اړه کار کوي.
نیلا ابراهیمي نن (شنبې د لړم ۳ مه) په خپل انسټاګرام پاڼې د یوه پوسټ په خپرولو سره لیکلي، چې د ۲۰۲۵ کال د «دوامداره پراختیايي اهدافو (SDGs) لپاره د ملګرو ملتونو د ځواونو مشرانو» یو له ۱۷ کسانو څخه ټاکل شوې ده.
هغې ویلي، د ملګرو ملتونو د ځوانو مشرانو په توګه د غوره کېدو مانا یې دا ده، چې «د یوې عادلانه او دوامداره نړۍ د جوړولو لپاره په نړیوالو هڅو کې برخه اخلي.»
دا پروګرام دوه کالن دی او غوره شوي کسان به په راتلونکو دوو کلونو کې د ملګرو ملتونو او د هغو د ګډونوالو سره نېږدې کار کوي، تر څو د دوامداره پراختیايي اهدافو تر لاسه کولو لپاره د افرادو د حقونو لپاره وکالت وکړي.
نیلا ابراهیمي تېر کال د ښځو او نجونو د حقونو د هڅو لپاره د ۲۰۲۴ کال د ماشومانو د سولې نړیواله جایزه هم تر لاسه کړې وه.
