کونړ او پروان ولایتونو کې د دوه جلا ترافیکي پېښو له امله د دوه ښځو، دوه ماشومانو او دوه نارینه وو په ګډون شپږو تنو ژوند له لاسه ورکړی او د دوه ښځو په ګډون شپږ تنه نور ټپیان شوي دي.
رخشانه: کونړ کې د طالبانو د امنیه قوماندانۍ ویاند فرید دهقان وايي، د دې ولایت په اسمار ولسوالۍ کې سیند ته د یوه کرولا موټر د لوېدو په پېښه کې یوې ښځې او خاوند ژوند له لاسه ورکړی او دوه ماشومان یې ورک شوي دي.
دغه پېښه تېره ورځ (جمعه د لړم ۲ مه) د اسمار ولسوالۍ د شابل په کلي کې د موټر چلوونکې د بې پروایۍ او د یوې «سراچه» موټر له سړکه د اوښتو او سیند ته د لوېدو له امله رامنځ ته شوې ده.
د هغه په وینا، د دې پېښې په ترڅ کې یو ښځې او خاوند یې ژوند بایللی، دوه ماشومان یې ورک دي او د دوه ښځو په ګډون شپږ تنه نور ټپیان شوي دي.
کونړ کې د طالبانو د امنیه قوماندانۍ ویاند ویلي، په سیند کې ورک شوي ماشومان دوه او اته کلن دي.
هغه د دې ترافیکي پېښې د ټپیانو د هویت او روغتیايي وضعیت په اړه څه نه دي ویلي.
په ورته وخت کې کونړ ولایت اسمار ولسوالۍ کې سرچینې وايي، د دې پېښې قربانیان د یوې کورنۍ غړي وو.
د سرچینو په وینا، دغه موټر د اسمار ولسوالۍ د شابل د کلي اوسېدونکي سخي مولا اړوند موټر وو او کور ته د تګ پر مهال سیند ته لوېدلی دی.
دغه راز په یوه بله ترافیکي پېښه کې، چې د پروان ولایت مرکز چاریکارو ښار کې رامنځ ته شوې، د یوې ښځې، دوه ماشومانو او یوه نارینه په ګډون څلورو تنو ژوند له لاسه ورکړی دی.
پروان کې د طالبانو امنیه قوماندانۍ ویلي، دغه پېښه تېره شپه (جمعه د لړم ۲ مه) ۸:۳۰ بجې د چاریکارو په رباط شهر سیمه کې رامنځ ته شوې ده.
دغه ترافیکي پېښه له یوه باروړونکي موټر سره د یوه کرولا موټر د ټکر له امله رامنځ ته شوې ده.
د کرولا موټر چلوونکې یوه ښځه وه او له چاریکار څخه د کابل په لور په حرکت کې وه، چې په لومړیو کې موټر له سړکه اوښتی او وروسته یې له باروړونکي موټر سره ټکر کړی دی.
د دې ترافیکي پېښې په پایله کې موټرچلوونکې ښځه، د هغې دوه ماشومان او یوه بل تن سورلي ژوند له لاسه ورکړی دی.
