طالبانو روانه اوونۍ په غور، بلخ او کابل ولایتونو کې د دوه ښځو په ګډون ۲۵ تنه د بېلا بېلو تورونو له امله د خلکو پر وړاندې په دورو وهلي دي.
رخشانه: دغه کسان د «اخلاقي فساد او الکولي مشروباتو د لېږد، د نشه کوونکو توکو د پېر، پلور او قاچاق، چرسو او الکلي مشروباتو) په تور په دې درې ولایتونو کې په دورو وهل شوي دي.
چهارشنبې د (لړم ۷ مه) د دوه ښځو په ګډون پنځه تنه د «اخلاقي فساد او الکولي مشروباتو د لېږد» په تور په غور او بلخ ولایتونو کې د خلکو پر وړاندې په دورو و وهل شول.
د دوه ښځو په ګډون څلور تنه د «اخلاقي فساد» په تور د غور ولایت د مرکز فیروزکوه ښار په سپورتي لوبغالي کې د خلکو پر وړاندې ۳۹ دورې وهل شوي دي.
معلومه نه ده، چې دې کسانو ته څومره موده د بند سزا اورول شوې ده.
یو بل تن د «الکولي مشروباتو د لېږد» په تور د بلخ ولایت په مرکز مزارشریف ښار کې په عام محضر کې په دورو وهل شوی دی.
معلومه نه ده، چې دا کس په څومره موده بند محکوم شوی دی.
د پنشنبې په ورځ د (لړم ۸ مه) ۲۰ تنه د «نشه کوونکو توکو د پېر، پلور او قاچاق، چرسو او الکولي مشروباتو» په تور په کابل کې په دورو وهل شوي دي.
دغه کسان کابل کې د طالبانو د نشه يي توکو او مسکراتو د مخنیوي ابتدایه محکمې د پرېکړې پر اساس له ۲۰ تر ۳۰ دورو پورې وهل شوي دي.
معلومه نه ده، چې دا کسان په څومره موده بند باندې محکوم شوي دي.
طالبانو د تېرې اوونۍ په جریان کې په پکتیکا، فاریاب، غزني او کاپیسا کې شپږ تنه د بېلا بېلو تورونو له امله د خلکو پر وړاندې په دورو وهلي وو.
