افغانستان کې د کډوالو نړیوال سازمان (IOM) وايي، د سرخکان ناروغي لا هم په افغانستان کې د ماشومانو د روغتیا لپاره یو جدي ګواښ دی.
رخشانه: دغه بنسټ نن (دوشنبې د لړم ۱۲ مه) پر خپله اېکس پاڼه د یوه پوسټ په خپرولو سره لیکلي، لس ورځې وړاندې د یوې کمپاین په ترڅ کې له زرو زیاتو ماشومانو ته په کابل کې د سرخکانو واکسین ورکړل شو.
د کډوالو نړیوال سازمان لیکلي، دغه کمپاین د روان میلادي کال د اکتوبر له اولې کابل کې د راستنو شویو کډوالو پنډغالي کې تر سره شو، چې په کې ۱۰۱۷ ماشومانو، چې ۵۰۸ یې هلکان او ۵۰۹ یې نجونې وې، د سرخکانو واکسین ورکړل شو.
څه موده وړاندې د روغتیا نړیوال سازمان اعلان کړی وو، چې د سرخکانو ناروغۍ سره د مبارزې په لومړي سرتاسري کمپاین کې یې له شپږو میاشتو تر لس کلنۍ پورې ۸.۹ میلیونه ماشومان په ټول هېواد کې واکسین کړي وو.
سرخکان یو له خورېدونکو او ماشومانو تر منځ د واکسین په تطبیق سره د مخنیوي وړ مرګ ژوبلې ناروغیو څخه ده.
د روغتیا نړیوال سازمان ویلي وو، افغانستان کې هغه ځای چېرته چې منظیم واکسیناسیون ته لاسرسی محدود دی او ډېره ماشومان لکه خوارځواکۍ سره مخ دي، په سرخکانو اخته کېدل کولی شي جدي زیانونه لکه سینه بغل، ړوندوالی او ان مرګ له ځان سره ولري.
دغه بنسټ زیاته کړې وه، چې په ۲۰۲۴ میلادي کال کې په ټول هېواد کې د سرخکانو ۹۳۰۰ پېښې ثبت شوې. د روان میلادي کال تر اګست میاشتې پورې ۸۵۰۰ پېښې نورې هم پر ور زیاتې شوې، چې کابو ۹۲ سلنه اخته شوي کسان یې له لس کلنۍ د کم عمر ماشومان دي.
د سرخکانو واکسین سرتاسري کمپاین په لومړي پړاو کې د روغتیا نړیوال سازمان، د ملګرو ملتونو د ماشومانو د ملاتړ صندوق «یونیسف او د دې بنسټ د ټولو همکارانو له خوا د هېواد په ۱۷ ولایتونو کې پلی شوی وو.
