طالبانو اعلان کړی، چې د هېودا په پنځو شمالي ولایتونو کې د شوې زلزلې د قربانیانو شمېر، ۲۷ تنه مړو او ۷۳۰ تنو ټپیانو ته رسېدلی دی.
رخشانه: د طالبانو تر واک لاندې باختر دولتي آزانس نن له ماسپښین وروسته (دوشنبې د لړم ۱۲ مه) اعلان کړي، چې دغه کسان په بلخ، سمنګان، کندوز، سرپل او بغلان ولایتونو کې مړه او ټپیان شوي دي. د دې پېښې له کبله په بلخ ولایت کې ۱۲ تنو ژوند بایللی او ۴۰۷ نور ټپیان شوي دي. سمنګان ولایت کې هم د مړو شویو شمېر ۱۱ تنه او د ټپیانو ۲۷۰ تنه ښودل شوی دی. سرپل ولایت کې ۴ تنه مړه او بغلان کې هم ۱۲ تنه ټپیان شوي دي.
باختر آژانس لیکلي، په دې طبیعي پېښه کې د کندوز پوهنتون ۴۱ تنه زده کړیالان هم ټپيان شوي، ټپیان د درملنې په موخه روغتونونو او روغتیايي مرکزونو ته لېږدول شوي دي.
طالبانو نه ده ښودلې، چې د د ې طبیعي پېښې په قربانیانو کې څومره ښځې او ماشومان شامل دي.
دا شمېرې وروستۍ نه دي او ښايي هره شېبه د هېواد په شمال کې د شوې زلزلې د قربانیانو شمېر زیات شي.
د طالبانو د عامې روغتیا وزارت ویاند شرافت زمان امرخېل نن له ماسپيښن وروسته په یوه ویډیويي پیغام کې د دې پېښې د قربانیانو شمېر ۲۰ مړه او ۵۳۴ ټپیان اعلان کړل.
هغه ویلي وو، ژغورنکي ټیمونه سیمې ته لېږل شوي او روغتونونو ته د دې طبیعي پېښې د ټپیانو د لېږد بهیر روان دی.
د امریکا د زلزلې سنجونې مرکز ویلي د زلزلې شدت چې د دوشنبې (لړم ۱۲ مې) شاوخوا یوه بجه د هېواد په شمال کې وشوه، ۶.۳ درجې وه او مرکز یې بلخ ولایت وو.
دا زلزله په سمنګان، بلخ، فاریاب، سرپل، تخار، کابل او کندوز ولایتونو کې هم احساس شوې ده.
افغاني سرې میاشتې هم په خپله اېکس پاڼه لیکلي، چې د تېرې شپې د زلزلې په نتیجه کې په بلخ او سمنګان ولایتونو کې ۱۹ تنو ژوند بایللی او ۳۲۰ نور ټپیان شوي دي.
په افغانستان کې د بشري مرستو د همغږۍ دفتر (اوچا) د هېواد په شمال کې د تېرې شپې د زلزلې د مرګ ژوبلې شمېره ۱۷ مړي او ۱۵۰ ټپیان اعلان کړي دي.
د ملګرو ملتونو په ګډون یو شمېر هېوادونو د دې طبیعي پېښې د قربانیانو له کورنیو سره خواخوږي ښودلې او له ټپیانو سره یې د مرستو کولو اعلان کړی دی.
