د بې پولې خبریالانو سازمان (RSF) وايي، له خبریالانو په زور اعتراف اخیستل، د وېرې رامنځ ته کولو لپاره د طالبانو استخباراتي ستراتېژي ده.
رخشانه: دغه بنسټ تېره ورځ (سه شنبې د لړم ۱۳ مه) په یوه بیانیه کې لیلکي «طالبان هڅه کوي، خبریالان مجرم وښيي، تر څو یې نیونه توجیه کړي او ټول خپلواک خبریالان له کاره لاس په سر کړي.»
بې پولې خبریالانو په خپله بیانیه کې زیاته کړې، د طالبانو له لوري په خبریالانو په زور اعتراف کول او د هغوی سپکاوی «په افغانستان کې د خبریالانو د بې رحمه ځپنې جدي پړاو ښيي.»
دغه بنسټ د طالبانو په زندان کې په بندي خبریال «مهدي انصاري په زور اعتراف» د وېرې رامنځ ته کولو لپاره د طالبانو استخباراتي ستراتېژي وبلله ویلي یې دي، طالبانو انصاري په زور اعتراف کولو ته اړ کړی دی.
د دې بنسټ په وینا «د طالبانو استخبارات په جنایت کوونکو د خبریالانو د بدلولو په لټه کې دی، تر څو یې نیونې توجیه کړي او د هر ډول خپلواکه راپور ورکولو مخیوی وکړي.»
بې پولې خبریالانو دغه «وېروونکې کړنلاره چې ورځ تر بلې په افغانستان کې دودېږي، په کلکه غندلې او په بېړنۍ توګه یې د مهدي انصاري او شپږو نورو خبریالانو، چې په غیر قانوني توګه د طالبانو سره زنداني دي، د خوشي کېدو غوښتنه کړې ده.»
طالبانو څه موده وړاندې د مهدي انصاري د اجباري اعتراف ویډیو د دې ډلې د عمومي استخباراتو اړوند «د هندوکش غږ» فسبوک پاڼې له لارې خپره کړه. هغه د دې ډلې پر ضد د «تبلیغاتو» او د افغانستان له جلا وطنه رسنیو سره د همکارۍ په تور نیولی او په یوه نیم کال بند یې محکوم کړی دی.
د ۲۰۲۱ په اګست کې د طالبانو په بیا راتګ سره په افغانستان کې رسنیزه فضا تر سخت فشار او پراخو محدودیتونو لاندې ده او لږ تر لږه ۱۶۵ خبریالان نیول شوي دي.
افغانستان د بې پولې خبریالانو د ۲۰۲۵ میلادي کال د نړیوالو مطبوعاتو د آزادۍ په شاخص کې د ۱۸۰ هېوادونو له ډلې ۱۷۵ ام ځای لري.
