په افغانستان کې د ملګرو ملتونو د بشردوستانه چارو هغږي کوونکي اندریکا راتواته ویلي، ملګرو ملتونو په ښځینه کارکوونکو د طالبانو د محدودیتونو له کبله د هرات اسلام کلا پوله کې خپل فعالیت درولی دی.
رخشانه: هغه تېره ورځ (سه شنبه د لړم ۱۳ مه) د فرانسې آژانس سره په مرکه کې ویلي، د طالبانو له لوري د دې محدودیتونو په پلي کولو سره «سمدستي عملیاتي ننګونې» رامنځ ته کړې او تر« ټولو ډېر ګواښ یې را ایستل شویو کډوالو په ځانګړې توګه ښځو او نجونو ته» متوجه کړی دی.
افغانستان کې د ملګرو ملتونو د بشري دوستانه چارو همغږې کوونکي د هرات اسلام کلا پوله کې د طالبانو له لوري د دې محدودیتونو د جزیاتو په اړه څه نه دي ویلي.
هغه پر دوام ویلي، د اسلام کلا پوله له ایران نه د را ایستل شویو افغان کډوالو د تېرېدنې لپاره اصلي نقطه ده، چې ۶۰ سلنه یې ښځې او ماشومان جوړوي.
د ملګرو ملتونو دغه چارواکی وايي: «ملګرو ملتونو او د هغو بشري همکارو بنسټونو نن (سه شبنه) د طالبانو د تازه محدودیتونو له کبله، چې د ملګرو ملتونو او د هغو د شریکانو پر ښځینه کارکوونکو یې د افغانستان او ایران تر منځ د اسلام کلا پوله کې ولګول، خپل فعالیت وځنډاوه.»
هغه د دې محدودیتونو لګولو څخه ناخوشي وښوده او خبرداری یې ورکړ، چې ملګري ملتونه له ښځینه کارکوونکو پرته نه شي کولی له ایرانه راستنو شویو ښځو او ماشومانو ته خدمات وړاندې کړي.
هرات کې سیمه ییزه طالب چارواکو تر اوسه په دې اړه څه نه دي ویلي.
افغانستان کې د ملګرو ملتونو سیاسي استازولۍ (یوناما) څه موده وړاندې ویلي وو، چې له ښځینه کارکوونکو پرته نه شي کولی اړمنو کسانو ته خدمات وړاندې کړي.
افغانستان کې د یوناما مشرې رزا اوتونبایوا هم د طالبانو له لوري د دې محدودیتونو له لګېدو وروسته اعلان وکړ، چې د ملګرو ملتونو پر ښځینه کارکوونکو محدودیتونو افغانستان کې د مرستو رسولو بهیر له خنډ سره مخ کړی دی.
هغې ټینګار کړی وو، چې اړمنو ته د مرستو رسولو په برخه کې د ښځینه کارکوونکو شتون اړین او د انکار نه کولو وړ دی.
