د افغانستان د ولیبال ښځینه ملي لوبډلې ریاض کې د ۲۰۲۵ د اسلامي هېوادونو د پیوستون لوبو کې، خپله دویمه لوبه د تاجیکستان ښځینه ولیبال ملي لوبډلې ته وبایلله.
رخشانه: د دې دواړو لوبډلو تر منځ سیالي نن (یکشنبې د لړم ۱۸ مه) له ماسپښین وروسته په ریاض ښار کې تر سره شوه.
د هېواد د ښځو ولیبال ملي لوبډلې نن هم ۳-۰ په پایلې سره لوبه خپلې تاجیکستاني سیالې لوبډلې ته وبایلله.
د هېواد ملي لوبډلې په درې واړه سټونو کې ۲۵ پر ۱۵، ۲۵ پر ۱۶ او ۲۶ پر ۱۷ ماته وخوړه.
د هېواد د ښځو ولیبالرانو په خپله لومړۍ لوبه کې هم د ورته پایلې سره له ترکیې ماته خوړې وه.
د افغانستان د نارینه وو ولیبال ملي لوبډلې ایرانی مشر روزونکی محمد اسدالهلي د افغانستان د ولیبال ښځینه ملي لوبډلې لارښودي هم پر غاړه لري.
دغه لوبډله د المپیک ملي کمېټې او د ولیبال نړیوال فدراسیون په همکارۍ له ایران، اسټرالیا او اروپايي هېوادونو څخه دغه لوبو ته لېږل شوی دی.
واک ته د طالبانو له راتګ وروسته د ښځو لپاره ټول سپورتي فعالیتونه ودرول شول او طالبانو اعلان وکړ، چې د ښځو سپورتي لوبډلې په رسمیت نه پېژني.
د افغانستان د ښځو لوبډلې ډېری له افغانستان نه بهر په بهرنیو هېوادونو کې جوړ شوي او یو شمېر یې په لوبو کې ګډون کوي.
د ریاض د ۲۰۲۵ اسلامي هېوادونو د پیوستون لوبو په شپږم پړاو کې د ښځو د ولیبال پنځه لوبډلو له ایران، افغانستان، ترکیې، آذربایجان او تاجیکستان څخه ګډون کړی دی.
