بادغېس کې سیمه ییز طالب چارواکي وايي، د دې ولایت بالامرغاب ولسوالۍ د «خوشه ای» ماین چاودنې د دوه ماشومانو ژوند واخیست.
رخشانه: باغېس کې د طالبانو د امنیه قوماندانۍ ویاند صدیق الله صدیقي په خپله اېکس پاڼه لیکلي، دغه پېښه نن سهار (یکشنبې د لړم ۱۸ مه) د بالامرغاب ولسوالۍ په «پنېرک» کلي کې رامنځ ته شوې ده.
د هغه په وینا، دغه دوه ماشومانو څاروي څړول، چې د خوشه ای ماین له موندلو وروسته یې هغه اور ته اچولی، چې د چاودنې له امله یې دواړه ماشومان وژل شوي دي.
بادغېس کې د طالبانو امنیه قوماندانۍ ویاند، د وژل شویو ماشومانو د هویت او سن په اړه څه نه دي ویلي.
تېره اوونۍ د ننګرهار روداتو ولسوالۍ کې د یوې پخوانۍ سرګولولې د چاودنې له کبله، یوه ماشوم ژوند له لاسه ورکړی او یوه ښځه او یو ماشوم ټپیان شوي وو.
