افغانستان کې د روغتیا نړیوال سازمان (WHO) په هېواد کې د شري ناروغۍ د زیاتېدو خبر ورکړی او له خلکو یې غوښتي، چې خپل ماشومان واکسین کړي.
رخشانه: دغه بنسټ نن (یکشنبې د لړم ۱۸ مه) په خپله اېکس پاڼه لیکلي، ماشومان د شري ناروغۍ د کم تر کمه دوه دوزه واکسین په کولو سره له دې ناروغۍ خوندي پاتې کېږي.
د روغتیا نړیوال سازمان زیاته کړې، «بېړنۍ اقدام [ او د واکسین تطبیق] د ناروغۍ د خورېدو مخنیوی کوي.»
یاد سازمان څه موده وړاندې هم اعلان کړی وو، چې د شري ناروغۍ سره د مبارزې په خاطر یې د واکسین په لومړي کمپاین کې د هېواد په ۱۷ ولایتونو کې له شپږو میاشتو تر لس کلنو پورې ۸.۹ میلیونه ماشومان واکسین کړي دي.
شری یو له خورېدونکو ناروغیو څخه ده، او د ماشومانو په منځ کې د واکسین په واسطه د مخینوي وړ مړینې یو لامل دی.
د روغتیا نړیوال سازمان د شمېرو له مخې په ۲۰۲۴ میلادي کال کې په ټول هېواد کې د شري ۹۳۰۰ پېښې ثبت شوې دي. د روان کال تر روانې اګست میاشتې پورې ۸۵۰۰ پېښې نورې هم پرې ور زیاتې شوې، چې کابو ۹۲ سلنه اخته کسان یې تر لس کلنۍ کم عمره ماشومان دي.
