ورلډ وېژن مرستندویه بنسټ (World Vision) ویلي، افغانستان د ماشومانو د سختې خوارځواکۍ له پلوه په ټوله نړۍ کې څلورم ځای لري.
رخشانه: دغه بنسټ نن (دوشنبې د لړم ۱۹ مه) په خپله اېکس پاڼه د یوه پوسټ په خپرولو سره لیکلي، افغانستان په نړۍ کې د خوارځواکۍ له تر ټولو بد ناورین سره مخ دی.
د ورلډ وېژن په وینا، افغانستان کې کابو ۳.۷ میلیونه تر پنځه کلونو کم عمره ماشومان په سخته خوراځواکۍ اخته دي، چې شاوخوا یو میلیون تنو یې په شدیده توګه وزن له لاسه ورکړی دی.
دغه بنسټ لیکلي، په افغانستان کې ۱.۲ میلیونه امیدواره او شیدې ورکوونکې مېرمنې هم له سختې خوارځواکۍ کړېږي.
ورلډ وېژن په افغانستان کې اړمنو کسانو ته د خدماتو رسولو لپاره د بودجې د کموالي خبرداری ورکړی وايي، د خوارځواکۍ د تغذیې ۳۰۵ سایټونه د مالي او لاسرسي مسائلو له کبله تړل شوي دي.
دغه مرستندویه بنسټ لیکلي، چې اوسنۍ بودجه افغانستان کې د اړمنو کسانو یوازې ۳۰ سلنه تر پوښښ لاندې نیسي.
ورلډ وېژن افغانستان کې له اړمنو سره د بېړنیو مرستو پر ګړندیتوب په ټینګار سره لیکلي، اوس د اقدام کولو وخت دی او «وږي او د خوارځواکۍ سره مخ ماشومان نور صبر نه شي کولی.»
څه موده وړاندې افغانستان کې د بشري مرستو د همږغۍ دفتر (اوچا) لیکلي وو، ښځو او ماشومانو د لوږې له بحران څخه ډېر زیان لیدلی دی.
دغه بنسټ لیکلي، افغانستان په نړۍ کې د لوږې له تر ټولو سخت ناورین سره مخ دی او کابو ۹.۵ میلیون کسان په شدیده توګه د خوړو نه خوندیتوب سره مخ دي او له هرو ۵ تنو یې ۱ هغه نه پوهېږې، چې راتلونکې خواړه به یې له کومه راځي.
له دې وړاندې هم نړیوالو سازمانونو او بنسټونو په وار وار د طالبانو تر واک لاندې افغانستان کې د بشري ناورین او لوږې د زیاتوالي په اړه خبرداری ورکړی وو.
د طالبانو ډلې هم په تېرو څلورو کلونو کې د محدودیتونو په لګولو او په هېواد کې د بشري مرستو رسوونکو بنسټونو د وېش په چارو کې د لاسوهنې سره بشري ناورین او لوږه په شدت سره زیاته کړې ده.
