په جلاوطنۍ کې د افغانستان د ښځو غورځنګ هرات کې د ښځو لپاره د چادرۍ اجباري کول د ټولنیز سپکاوي تر ټولو بې رحمه ډول او دا یې د هغوی د اساسي حقونو محدودول وبلله.
رخشانه: د دې اعتراضي غورځنګ غړو نن (دوشنبې د لړم ۱۹ مه) په یوه بیانیه کې هرات ولایت کې دولتي ادارو او حوزي روغتون ته د بې چادرۍ ښځو نه پرېښودل په کلکو ټکو وغندل.
په بیانیه کې راغلي، د طالبانو دغه اقدام نه یوازې د خپلواکه تګ راتګ او انساني کرامت څخه ښکار سرغړونه ده، بلکې د د ټولنیز سپکاوي تر ټولو بې رحمه ډول او دا یې د ښځو د اساسي حقونو محدودول ګڼل کېږي.
معترضو مېرمنو و ویل، طالبانو په دې «افراطي محدودیتونو» سره هڅه کوي، ښځې له ټولنیز ژوند څخه محرومې کړي او ان په داسې ځایونو، لکه روغتونونو کې د هغوی شتون جرم وبولي.
په جلاوطنۍ کې د افغان ښځو د اعتراضي غورځنګ غړو د بشري حقونو له بنسټونو او نړیوالې ټولنې غوښتي، چې د طالبانو دغه اقدام د افغانستان د ښځو انساني او ټولنیزو حقونو څخه ښکاره او جدي سرغړاوی وپېژني.
دوی د دې شاته تګلارې د سملاسي لغوه کولو غوښتنه کړې او ویلي یې دي، نړیواله ټولنه باید په افغانستان کې د ښځو د اساسي حقونو د ملاتړ لپاره کلک او عملي دریځ غوره کړي.
معترضو مېرمنو ویلي، دوی به د طالبانو له لوري د ښځو پر وړاندې د پراخو محدودیتونو په اړه غلې پاتې نه شي.
طالبانو د تېرې اوونۍ د چهارشنبې په ورځ دولتي ادارو، روغتونونو او عمومي ځایونو ته د بې چادرۍ ښځو په ننوتو بندیز ولګاوه.
د دې محدودیتونو په ترڅ کې دغې ډلې نن سهار هرات کې یوه ښځینه ډاکتره د چادرۍ نه اغوستو له امله نیولې او یو ساعت وروسته یې خوشې کړې ده.
