د هېواد ختیځ کې د شوې زلزلې څخه شاوخوا دوه میاشتې وروسته، افغانستان کې بې پولې ډاکترانو (MSF) اعلان کړی، چې د ژمي په رارسېدو سره یو بل ګواښ په لار دی.
رخشانه: دغه بنسټ نن (چهارشنبې د لړم ۲۱ مه) په یوه اعلامیه کې لیکلي، تر اوسه یې کابو ۷۵۰۰ کسان د کونړ د نورګل ولسوالۍ په «پټان» او «اري ګمبه» پنډغالو کې د دوه کلېنیکونو او یو ګرځنده روغتیايي مرکز له خوا چې لومړني خدماتو وړاندې کوي، درملنه کړي دي.
دا ځمکلړزه په وروستۍ یوه لیزه کې په هېواد کې تر ټولو خونړۍ زلزله وه، چې په څلورو ولایتونو، له هغې په کونړ او ننګرهار کې یې له ۲۲۰۰ زیات کسان وژلي او له ۳۰۰۰ زیات کسان ټپیان کړي دي.
بې پولې ډاکترانو لیکلي، له دې ځمکلړزې زرګونه ژوندي پاتې شوي کسان اړ شوي، چې خپل کورونه پرېږدي او په لنډمهاله پنډغالو کې ژوند وکړي.
پنډغالي په نورګل ولسوالۍ کې «پټان» او «اري ګمبه» د زلزلې ځپلو کسانو د استوګنې لپاره له هغه دوه پنډغالو دي، چې د سختو ځپل شویو کلیو په ټولیز ډول شاوخوا ۸۰۰۰ کسانو ته په کې ځای ورکړل شوی دی.
بې پولې ډاکترانو پر دوام لیکلي، د خپلوانو له لاس ورکولو او کورونو نړېدو د غم تر څنګ په بېړې سره ژمی پیل شوی او په ځینو سیمو کې ښايي واورې وشي.
دغه بنسټ په اري ګمپه پنډغالي کې د یوه بې ځایه شوي تن له خولې لیکلي، د ژمي په پیل سره په دې خېمو کې ژوند کول امکان نه لري.
هغه ویلي: «همدا څو ورځې وړاندې لږ باران او ګلۍ وشوه، زموږ ماشومانو او ښځو ډېر کړاو کش کړ. زموږ کالي او توکي تر کنډوالو لاندې دي. څو کمپلې یې راکړې، خو دا د یخنۍ پر وړاندې هېڅ نه دي، خېمې هم د سړو توان نه لري.»
بې پولې ډاکترانو ټینګار کړی، چې د هوا په لا سړېدو سره ښاغلي فصلي ناروغۍ، لکه ساه لنډی او خورېدونکې ناروغۍ لکه شری او شنه ټوخلې زیات شي. خلک په پنډغالو او لنډمهاله سرپناوو کې ګرموونکو او برېښنا پرته ژوند کوي.
کونړ کې د MSF د روغتیايي پروژې مسوول ډاکتر عصمت الله عصمت ویلي: «باید ډېر اقدامات وشي، تر څو بې ځایه شوي کسان وتوانېږي تر هغې چې کورونو ته ستنېږي یا یوه تل پاتې حل لار وموندل شي، په ښو شرایطو کې ژوند وکړي.»
