د هرات ولایت د حوزوي روغتون داخله متخصص او سونوګرافۍ برخې مسوول ډاکتر احمد فرید هویدا خپلوان وايي، چې هغه د طالبانو استخباراتو نیولی دی.
.رخشانه: د هویدا مېرمن شبانه خیري تېره ورځ په خپله فسبوک پاڼه د یوه پوسټ په خپرولو سره لیکلي، چې د طالبانو استخباراتو یې خاوند سهار ۹ بجې نیولی دی
مېرمن خیري په خپله فسبوک پاڼه لیکلي: «د نیولو له وخته تر اوسه پورې له ډاکتر هویدا سره هېڅ ډول اړیکه نه ده نیول شوې او شخصي موبایل یې هم بند دی.»
تر اوسه معلومه نه ه، چې ډاکتر هویدا په کوم دلیل نیول شوی او کوم ځای ته لېږدول شوی دی.
دا په روانه اوونۍ کې د هرات د حوزوي روغتون څخه د دویم ډاکتر نیونه ده. طالبانو د دوشنبې په ورځ د عمومي جراحۍ متخصصه ډاکتر شبنم فضلي هم د اجباري حجاب پر وړاندې د مقاومت له امله د امربالمعروف کارکوونکو په واسطه د څو ساعتونو لپاره نیول شوې وه.
د هرات د حوزوي روغتون د ډاکترانو نیونه پر داسې مهال کېږي، چې طالبانو د تېرې اوونۍ د چهارشنبې له ورځې راهیسې دولتي ادارو او عمومي روغتونونو ته د بې چادرۍ ښځو ننوتل منع کړي دي. هغه ویډیوګانې، چې رخشانې رسنۍ ته رسېدلې ښايي، چې په وروستیو ورځو کې د طالبانو مامورین د حوزوي روغتون په دروازه کې په تاوتریخوالي سره د ښځو د ننوتو مخنیوی کوي.
