د بشر حقونو د فعالانو اتحاد د محصل د نړیوالې ورځې په مناست اعلان کړي، چې افغانستان کې د نجونو پر مخ د پوهنتونون تړل کلتوري نسل وژنه او د بشریت پر وړاندې جنایت دی.
رخشانه: دغه بنسټ نن (دوشنبې د لړم ۲۶ مه) په یوه اعلامیه کې لیکلي، په افغانستان کې «زده کوونکی کېدل یو جرم ګرځېدلی، پوهنتون د ځپلو ډګر او پوهه د طالبانو د واکمنۍ لپاره په یوه ګواښ بدله شوې ده.»
له یوزر ۶۳ زیاتې ورځې کېږي، چې طالبانو د نجونو پر مخ د دولتي او خصوصي پوهنتونونو دروازې تړلې دي.
د بشرحقونو د فعالانو اتحاد په خپله اعلامیه کې لیکلي، چې طالبانو د زده کړو له حق څخه په بشپړه توګه د نجونو په محرومولو، د پوهنتونو دروازو په تړلو، د علمي ریشتو په لرې کولو، د خپلواکو استادانو په ایستلو او د افراطیت په مدرسو د ښونځیو اړولو سره په معاصره نړۍ کې د زده کړې پر حق یو له خورا ظالمانه او سیستماتیک بریدونو تر سره کړی دی.
د بشري حقونو دغه بنسټ په هېواد کې د نجونو او ښځو پر زده کړو او تحصیل د طالبانو محدودیتونو ته په اشارې لیکلي، دغه محدودیتونه «د نړیوالو اسنادو پر بنسټ د کلتوري نسل وژنې، جنسیتي توپیر او بشریت پر وړاندې جنایت بلل کېږي.»
په اعلامیه کې راغلي: «طالبانو له زده کړو د نجونو په مخنیوي، په افراطي مدرسو د ښوونځیو بدلول، د علومو سانسور، د علمي ریشتو او پوهاوی په لرې کوو او د نظامي- مذهبي ایډیولوژۍ په تحمیلولو سره په واقعیت کې د یوه نسل د پوهې د ريښو را ایستل مخ ته وړي.»
د بشرحقونو د فعالانو اتحاد لیکلي، د نړیوالې جنايي محکمې (ICC) د روم د قانون له مخې، د زده کړې د حق په ګډون د بنسټیزو حقونو څخه سیستماتیک محرومیت، د انسانیت پر وړاندې جرم ګڼل کېږي.
دغه بنسټ ویلي، طالبان د ښوونیزو بنسټونو په لمنځه وړلو سره، د یوه نسل کاري فرصتونه او فکري وړتیا له منځه وړي او له زده کړو د نجونو سیستماتیک محرومیت د بشریت پر وړاندې جنایت دی.
د بشرحقونو د فعالانو اتحاد له نړیوالې ټولنې، نړیوالو بنسټونو، پوهنتونونو او بشري حقونو له سازمانونو غوښتي، چې د زده کړیالانو پر وړاندې د طالبانو چلند کلتوري نسل وژنه وپېژني او محکمې ته د دې «جنایت کوونکې» ډلې په راکاږلو کې عملي ګامونه پورته کړي.
