د افغانستان د بدن جوړونې ښځینه لوبغاړې رویا کریمي په نړیواله «ویلنس نچرل» سیالۍ کې د درېیم مقام په ترلاسه کولو وتوانېده.
رخشانه: دغه نړیواله لوبه تېره ورځ (یکشنبې د لړم ۲۵ مه) د اسپانیا هېواد د بارسلونا ښار ته نېږدې په سانتا سوزانا ښار کې تر سره شوه.
په دې سیالۍ کې د IFBB Pro World Championships برخې چې Body Fitness او Wellness Fitness هم په کې شاملې وې تر سره شوې.
رویا کریمي په دې نړیوالو سیالیو کې د بدن جوړونې مسلک (Pro) برخه کې ګډون کړی وو او د کابو ۴۵ ګډونوالو منځ کې درېیم مقام ته رسېدلې ده.
د هېواد د بدن جوړونې څانګې دغه لوبغاړې په خپل انسټاګرام د یوه پوسټ په خپرولو سره د دې مقام له تر لاسه کولو خبر ورکړی دی.
هغې دغه بریا د افغانستان ښځو ته ډالۍ کړې ده، هغه ښځې چې «له دې آزادۍ څخه محرومې دي.»
کریمي لیکلي: «تاسو [د افغانستان ښځې] زما ځواک یۍ او په دې سره زما روح د افغانستان له هرې ښځې سره دی، چې وزرې یې محدودې شوې دي.»
رویا کریمي په داسې حال کې په نړیوال ډګر ځلېدلې او مډال یې تر لاسه کړی، چې د افغانستان ښځې او نجونې د نورو پراخو محدودیتونو تر څنګ له سپورت څخه هم منع کړای شوې دي.
دې لوبغاړې څه موده مخکې په متحده عربي اماراتو کې د بدن جوړونې سیالیو کې د اتلولۍ تر لاسه کولو وروسته د دې څانګې مسلکي کار تر لاسه کړ.
